Џипови и бесни коли, а зад воланите најчесто „жестоки“ момци со карактеристични тетоважи и понекој златен синџир на вратот, кои нестрпливо газат на педалот за гас додека се разминуваат низ тесните сокаци на Дерми, кои водат до некоја од многубројните плажи. Јуни е, но, сепак, радиостаниците најавуваат уште еден топол викенд, со преполни со автомобили патишта. Сите брзаат што побргу да стасаат на море и по цена да „отепаат“ некој час повеќе зад воланот за да стасаат до Саранда, Ксамил, или до Дерми и Химара, кои се поблиску до Валона.

Дримадес, чиешто албанско име е Дерми, е населба на брегот на Јонското Море во Албанија, а нејзиното население зборува архаична форма на грчкиот јазик и се гордее со дури 42 православни цркви во својата околина. Сместена е точно под највисокиот дел на планинскиот масив што му припаѓа на националниот парк Логара, со падини кои остро се спуштаат кон морето. Дерми е дел е од округот Саранда, кој во последниве години интензивно туристички се развива.

Албанија бележи подем како регионална туристичка сила. Долгите плажи со бели камчиња и карактеристичното тиркизно море се меѓу најголемите адути на туристичката понуда. Кон крајот на јуни, кога го посетивме, сместувачките капацитети во Дерми забрзано се пополнуваа, а на плажите, освен албанскиот, се слушаа и македонскиот и српскиот јазик. Според интензитетот со кој на почетокот на сезонава се уплатуваа аранжманите на домашните туристички агенции за албанските летувалишта, и летово постои голема заинтересираност на македонските граѓани за одмор во Албанија. Дека туристичките работници од јужното албанско приморје очекуваат навистина многу туристи летово, покажуваат и густо збиените лежалки, поставени на плажите, каде што секој квадратен метар под жешкото сонце значи потенцијал за заработка.

Запалени лежалки, пресметки на плажа

Дерми, или Дримадес, како едно од туристичките места, во кои е најбрз подемот и трансформацијата од заспано приморско селце во монденско летувалиште, деновиве стана актуелно и по веста дека на една од неговите плажи се случил инцидент, во кој се запалени 60 лежалки за плажа, кои му припаѓале на еден од сопствениците на баровите на „Дримадес бич“. Според штурото соопштение на локалната полиција, некаде по полноќ, на 27 јуни, биле запалени и уништени дрвени лежалки, кои му припаѓале на лицето со иницијали Б.Д. Снимките покажуваат пеплосани остатоци од опрема за плажа, во чие непосредно соседство неоштетени се исти такви лежалки и чадори за сонце на други сопственици. Оштетениот, наводно, имал конфликт околу правото да поставува лежалки на плажата, кој извршителот очигледно сметал дека ќе го реши со криминално подметнување пожар.

Трагична разврска имаше сличен таков спор, само два дена претходно, при престрелка со огнено оружје во која беа убиени четири лица во приморско летувалиште во близина на Велипоја, на север од Албанија. По оваа вест, медиумите известуваа дека туристите го напуштаат ова популарно летувалиште.  Во услови кога полицијата и правосудството се само неефикасни набљудувачи, насилството и убиствата заради личниот профит носат само контраефект на албанскиот туризам воопшто.

Во вилата на Енвер Хоџа сега ужива Еди Рама

Само на петстотини метри воздушна линија подалеку од плажата во Дерми, каде што беа запалени лежалките, се наоѓа државната вила на албанскиот премиер Еди Рама. Сосем случајно бевме таму токму кога поголема колона црни џипови со темни стакла, со полициска придружба влегуваше низ портата. Вилата со сопствена плажа, градена за Енвер Хоџа во 60-тите години од минатиот век, не им била омилена на претходниците на Рама, кој наредил таа комплетно да се реновира. Сега, ако им се верува на албанските портали, албанскиот премиер често ја користи, заедно со своите гости, меѓу кои се и светски познати личности.

Минатиот викенд, на посетителите на владината вила, сепак не им беше до капење и сончање. Плажата остана празна, иако беше под будното око на полицајци во цивилка и полициски глисери. Веќе во неделата, Еди Рама, на враќање кон Тирана, во блискиот град Валона на насобраните новинари им најави темелна реорганизација на државната полиција. Албанија континуирано покажува недоволна ефикасност во борбата со корупцијата во полицијата, на што минатата година укажа и ГРЕКО. Истражувања покажуваат дека дури 40 проценти од албанската економија отпаѓа на сивата економија и нелегалниот бизнис, во што ги надминува и соседните Косово и Македонија за девет, односно 10 проценти. Инцидентите на плажите на албанското приморје само ги актуализираа овие теми, токму тогаш кога на туристичката сезона на Албанија тоа најмалку ѝ требаше. Тоа сигурно ќе одврати дел од туристите што за летово ја разгледуваа Албанија како опција за летување. Колку и да влијае неповолно овој настан на потенцијалните туристи, можноста границата да се помине само со лична карта во време кога многу македонски граѓани имаат проблем да извадат пасош, прекрасното море и разумните цени кои ги нудат угостителите, љубезноста на локалните жители и другите предности сепак ја прават оваа дестинација една од најдостапните за македонските граѓани.