Сонувам дека еден ден ќе можам нормално да облечам фармерки и патики, вели скопјанецот Славчо Апостолов (39), кој боледува од елефантијаза, болест што се карактеризира со здебелување на кожата и поткожното ткиво. Тој за една година ослабна околу 120 килограми за да се подготви за серијата операции на нозете што ќе ги врши лекарски тим од Клиниката за пластична хирургија во Скопје.

Апостолов вели дека болеста е таква што му се појавуваат ранички на нозете што го принудуваат на чести преврски. Иако претходно преку „Слободен печат“ бараше помош за да се оперира во Турција и собираше донации, откако не успеа да собере доволно, реши да се оперира во Македонија.

– Отворив боледување и нема да одам во Турција. Се подготвувам за операција на Клиниката за пластична хирургија. Директорката д-р Софија Пејкова ме информираше дека следуваат повеќе операции. Откако ќе завршат со нозете, потоа ќе ми ги оперираат и другите делови од телото за да се санираат остатоците од масното ткиво и кожата. Многу сум возбуден. Конечно дојде спасот и за мене – изјави Апостолов за „Слободен печат“.

Тој работи како одржувач на зеленилото во Општина Аеродром. Во изминатиов период работел со неподносливи болки.

Борбата на Славчо со килограмите почнала пред една година, кога во екот на пандемијата со коронавирусот решил да се оперира во Турција. Пред повеќе од една година тежел повеќе од 220 килограми.

– Имав 221 килограм, но лани, на 13 март, среде најголемата ковид-криза, направив операција во Турција за дебелината. Цел живот се борам, не само со дебелината, туку и со луѓето околу мене. Поради дебелината отсекогаш сум бил омаловажуван, навредуван, напаѓан, ми беше вршен мобинг на работното место. Поради сето ова се затворав во себе, а храната ми беше утеха – вели Апостолов.

Порано мислел дека нозете му се големи поради прекумерната тежина, но и покрај слабеењето, забележал дека во пределот на глуждовите останале отоци.

– Бев кај кардиоваскуларен хирург и ми рече дека мора под итно на операција – објаснува Апостолов.

За повторно да не се здебели, тој секојдневно се труди да пешачи, колку и да е болно тоа за него.

– Болките се интензивни. Не можам да чекорам без болка. Се чувствувам како некој со нож да ме сече, како постојано нешто да ме притиска – вели Славчо.

Фондот за здравство најверојатно ќе ги покрие трошоците за операциите во Македонија, затоа што според Законот за здравствено осигурување, сите болести и состојби за кои има медицинска индикација и се изведуваат во јавните здравствени установи, се на товар на средствата на Фондот.

Славчо Апостолов од Скопје ослабе 120 килограми и моли да му ги оперираат нозете за да може да живее нормално