Светската трговија со течен природен гас малку се зголеми и во 2024 година, со остар пад на европскиот увоз поради високите залихи и слабата побарувачка, се наведува во извештајот на Меѓународната асоцијација за гас. Глобалната трговија со течен природен гас порасна за 2,4 проценти минатата година, само малку посилно отколку во 2023 година, достигнувајќи 411,24 милиони тони, се вели во извештајот на ИГУ, објави АлЏезира Балканс. САД ја задржаа својата позиција како најголем извозник со испорачани 88,4 милиони тони течен гас. Австралија е на второ место со 81 милион тони, Катар на трето место со 77 милиони тони, а Русија на четврто место со 33,5 милиони тони испорачан течен природен гас, објавува Хина. Кина беше најголем увозник и минатата година, со купени 78,6 милиони тони течен гас.

Јапонија е на второ место со 67,7 милиони тони течен природен гас. Сепак, европскиот увоз на течен природен гас (ТПГ) нагло се намали за околу 17 проценти, на 100 милиони тони, поради високите нивоа на залихи на почетокот на годината, слабата побарувачка и стабилните испораки на гас преку цевководи, велат авторите на извештајот. Британскиот увоз се намалил најмногу минатата година – за 6,48 милиони тони, по што следат Франција и Шпанија, кои купиле 3,75 милиони тони и 3,49 милиони тони помалку гас отколку во 2023 година, соодветно. Во 2024 година, бројот на носачи на ТПГ се зголемил за 7,5 проценти – на вкупно 742 бродови, пресметало здружението. Во 2023 година се зголемил за пет проценти. До 2031 година, ќе бидат изградени уште 337 бродови, проценуваат тие.