Во Албанија продолжува трендот на раст во туризмот – бројот на странски посетители во првите четири месеци од годинава достигнал 2.45 милиони, објави премиерот Еди Рама, кој ги сподели бројките во објава на Фејсбук, истакнувајќи дека 820 илјади странски посетители уживале во Албанија само во текот на април.

„Во Албанија, во текот на месец април уживале 820 илјади странски посетители, зголемувајќи ја нивната вкупна бројка на 2,45 милиони во првите 4 месеци од 2025 година. Овој раст покажува дека Албанија ја консолидира својата нова позиција на европската туристичка мапа, бидејќи и понатаму се смета за изненадување на европските дестинации дури и за 2025 година“, пишува Рама.

Тој наведува дека во истиот период лани во земјата престојувале 2,33 милиони странски посетители, а во 2023 година таа бројка изнесувала 1,68 милиони.

Лани вкупно во Албанија престојувале над 11,7 милиони странски туристи, што е зголемување од 15,2 отсто во однос на 2023 година.