Лошата состојба со јавниот превоз со која подолг период се соочува Скопје, два дена е катастрофална, откако превозот се сведе на 25 автобуси што возат на гас, и уште неколку други што денеска во претпладневните часови сѐ уште имаа нафта, а потоа и тие се исклучија и се повлекоа во базите. Приватните превозници, пак, наместо да помогнат, продолжија да не возат, како и во изминатиов период.

Како што дознаваме од извори во ЈСП „Скопје“, нова испорака на нафта досега не е направена, па сите надежи се свртени кон Советот на Град Скопје и Владата.

Владата вонредно расправаше поради недостигот на енергенси за обавување на јавниот сообраќај на територијата на Град Скопје, при што била констатирана лошата состојба и недостиг на гориво за потребите на ЈСП при што Владата се вклучи во решавање на овој проблем, соопштија од Владата.

Се донесе одлука со која се утврдува постоење на кризна состојба во снабдувањето со топлинска енергија на подрачјето на град Скопје, заради недостиг на топлинска енергија, можноста за користење на алтернативно гориво и состојбите на пазарот на топлинска енергија. Со ова се овозможува да се позајмат на градот Скопје дел од нафтените резерви на државата. Денес меѓудругото Бирото за јавни набавки донесе одлука со која се исполнети условите за спроведување на постапка со преговарање без објавување на оглас за да се скрати периодот за набавка на дериватот потребен на градот Скопје. Со ова Владата го затвора прашањето со настаната потешкотија во работењето на градското претпријатие за јавен сообраќај. – соопштија од Владата.

Граѓаните и учениците вчера и денеска беа оставени на „цедило“ да се снаоѓаат како знаат и умеат за да стигнат на работа и на училиште, но и да се вратат дома, а Скопје доживува невиден сообраќаен хаос, затоа што и оние што редовно користат автобуси, ги извадија автомобилите од гаражите. Дел од скопјани се организираа со заеднички превоз.

Гневот на граѓаните е голем и оправдан, а утре е можно е тој да се излее и на протестот пред Град Скопје, што го организира  градоначалникот на Општина Шуто Оризари, Курто Дудуш. И студентите се заканија дека ќе му се приклучат на протестот доколку Град Скопје не воспостави ред во јавниот превоз и доколку не пристапи кон негова модернизација и реализација на запрените проекти, како што е оној за брз автобуски проект, за кој три години залудно стојат пари од ЕБОР на сметка и се плаќаат „пенали“ затоа што не се користат.

Она што е најчудно е што два дена откако нема автобуси по скопските улици, нема никакво официјално објаснување за тоа што се случува од ЈСП „Скопје“ и од директорот Драги Кушовски.

Град Скопје, пак, се огласи во средата, со обвинување дека кризата со нафтата е креирана од ВМРО-ДПМНЕ.

Кадарот на шефот на ВМРО-ДПМНЕ во Бирото за јавни набавки Маре Богева, креира криза во ЈСП за гориво, со тоа што за првпат од постоењето на претпријатието, ја поништи редовната јавна набавка за гориво во ЈСП како смислено сценарио – посочија од Град Скопје.

Но, од Бирото за јавни набавки му порачаа на Град Скопје наместо да шири политиканство, навремено треба да реагира и да ги искористи законските можности што му стојат на располагање да се задоволат итните потреби за гориво до завршување на редовната постапка.

Оттаму објаснија дека ЈСП „Скопје“ избрало неприфатлива понуда за набавка на гориво како најприфатлива и дека при управната контрола е констатирано дека оваа понуда, која била и единствена поднесена во постапката, не исполнува услов што самиот ЈСП го навел од тендерската документација.

 Управната контрола, имајќи го тоа предвид, дала јасни инструкции што треба да преземе ЈСП во записникот од спроведена управна контрола. Имено, со оглед на тоа што ЈСП направил избор на неприфатлива понуда, а други понуди немало во постапката, дала инструкции комисијата за јавна набавка да ја стави вон сила донесената одлука за избор и да донесе одлука за поништување на постапката. Таквите инструкции се во согласност со член 177 став 3 од законот. Напоменуваме дека ЈСП не ја искористил ниту можноста да ги оспори инструкциите на Бирото преку механизмите што му стојат на располагање во законот, од едноставна причина што станува збор за правилно утврдена фактичка состојба од страна на Бирото и исход на постапката кој не може да биде поинаков, а да биде согласно со законот – се вели во соопштението од Бирото.

Државното јавно обвинителство денеска ѝ даде насоки на Управата за финансиска полиција да ги испита постапките за јавни набавки на мазут за потребите на ЈСП.

Во меѓувреме, никој од надлежните не може со сигурност да каже кога ќе се реши овој проблем што „удри по грбот“ на граѓаните. Но и доколку се најде решение за актуелната ситуација, генералниот проблем за кој нема брзо решение останува, а тоа е дека јавниот превоз е во катастрофално лоша состојба, дека недостасуваат стотина автобуси, а нови не се набавуваат.