Вицепремиерот и министер за транспорт Александар Николоски вчера ги нарече маргиналци министрите во техничката влада на Бугарија, нагласувајќи дека со нив македонската влада нема да разговара за евроинтеграциите, туку ќе чекаат да поминат бугарските избори и да се избере политичка влада. Одговарајќи на новинарско прашање за острата реакција од бугарското МНР дека идеите на македонската влада за репреговарање на преговарачката рамка со ЕУ може да доведат до ново оддалечување на Македонија од европскиот пат, Николовски рече дека таквата политика на Бугарија не е од вчера, туку трае во континуитет од 2020 година.

– Секогаш кога ќе дојдат избори во Бугарија се злоупотребува темата Македонија. Не сум сигурен кога им се изборите, затоа што до толку се нефункционални што не можат ни избори да закажат, ова им се седма или осма техничка влада, не можат веќе луѓе да најдат за во техничката влада. Нека си ги средат прво дома работите, нека изберат политичка влада, па ќе седнеме и ќе разговараме со политичката влада. Немам намера да одговарам на луѓе кои ловат политички поени, а се политички маргиналци во моментов во Бугарија, затоа што се претставници на техничка влада која нема легитимитет од никого – рече вчера Николовски на прес-конференцијата на која зборуваше дека Македонија нема да ја гради пругата кон Бугарија додека не се направи издржан проект и не се добијат гаранции дека и Бугарија ќе го гради својот дел.

Бугарско МНР: Условите за Македонија нема да се сменат

Претходно и премиерот Христијан Мицкоски изјави дека во октомври во Бугарија се закажани изборите, а дотогаш таму ќе има техничка влада, па затоа треба да се почека да заврши тој процес, а дијалогот меѓу двете земји да го водат политички влади. Премиерот Мицкоски во неколку наврати кажа дека за нив е прифатливо да се направат измени на Уставот и во него да се внесе бугарското малцинство, но уставните измени да стапат на сила во моментот кога Македонија ќе биде примена во ЕУ. Тој нагласува дека сакаат гаранции од ЕУ дека Бугарија нема повторно да ни стави вето или да поставува нови услови и барања додека траат преговорите за членство во ЕУ.

Но, бугарското МНР во своето соопштение завчера попладне ги „пресретна“ овие најави и желби како невозможни, со став дека нема се случат нови разговори за преговарачката рамка.

– На власта во Скопје треба да им биде јасно дека обидите за лансирање идеи за повторно преговарање на веќе преземените меѓународни обврски може да доведат само до дополнително оддалечување од почетокот на преговорите за членство во ЕУ. Овој наш став нема да се смени без разлика дали управува техничка или редовна влада. Потсетуваме дека како резултат на непотребните провокации и конфронтации со соседните земји, Северна Македонија веќе изгуби премногу време во процесот на отворање на пристапните преговори – соопшти бугарското МНР.

Техничката влада на Бугарија е легитимна влада, се додава во соопштението и ги има сите прерогативи за управување со земјата. Бугарското МНР наведува дека остануваат отворени за дијалог со Македонија, но, без разлика дали е техничка или политика влада, тој дијалог не вклучува повторно преговарање за веќе преземените обврски од Скопје.

– Би сакале повторно да потсетиме дека европскиот консензус од летото 2022 година меѓу 27-те земји-членки на ЕУ и Северна Македонија целосно ги опишува сите чекори за постигнување вистински напредок во процесот на европска интеграција на оваа земја. Бугарската позиција е јасно наведена во Одлуката на Народното собрание од 24 јуни 2022 година, поддржана од сите политички сили. Тоа е израз на волјата на бугарските граѓани да ја поддржат Северна Македонија во процесот на исполнување на критериумите за членство во ЕУ, под услов соседната земја да се придржува до највисоките стандарди во областа на човековите права и да ги исполни превземените меѓународни обврски. Оваа позиција на национално ниво нема да се менува – соопшти МНР на Бугарија.

Мицкоски: Евроинтеграциите сè уште се во вител без крај

Премиерот Мицкоски деновиве повтори дека Владата ќе продолжи да работи на полноправно членство за влез во ЕУ и за одблокирање на евроинтегративните процеси, но додаде дека тоа не зависи само од нас.

За неизвесноста на македонските евроинтеграции тој вчера зборуваше во Загреб, по средбата со хрватскиот премиер Андреј Пленковиќ.

– Благодарен сум за поддршката што ја добиваме од премиерот Пленковиќ, од министрите во хрватската Влада за евроинтегративните процеси, иако фрустрацијата и неправдата којашто ни е нанесена како македонски граѓани, како држава е голема, бидејќи повеќе од две и пол децении поминаа откако го почнавме овој пат. Но, за жал сè уште сме во еден вртлог којшто нема извесен крај, иако желбата на македонските граѓани да бидат дел од семејството на ЕУ е голема. Се надевам дека како нова влада, со реформите што планираме да ги направиме најпрвин на домашен план, а потоа и во соработка со нашите пријатели, хрватската Влада, но и останатите пријатели од членките на ЕУ, конечно таа неправда после повеќе од две децении ќе биде исправена и македонските граѓани ќе бидат дел од големото европско семејство – рече Мицкоски.

Тој изрази увереност дека европските граѓани и политичари ќе ги споделуваат европските вредности во иднина и дека „нема да бидеме жртви на билатерални спорови во нашата целосна интеграција“.

Евроинтеграциите на Македонија заглавија на условот уставни измени. Македонија мора да ги стави Бугарите во Уставот за да се заврши процесот на отворање на преговорите. Додека тоа не биде сторено не може да се отвораат поглавјата од преговарачката рамка.

Овој услов уследи откако Бугарија стави вето во 2019 година, кога бугарската влада на чело со Бојко Борисов не ја поддржа преговарачката рамка за Македонија и одржување на првата меѓувладина конференција со Брисел. Софија тогаш побара во преговарачката рамка да се вметнат три основни услови – придржување кон формулацијата за македонскиот јазик од 1999 година, патоказ за спроведување на Договорот за добрососедство и изјава од македонската страна дека нема да се поддржуваат претензии за македонското малцинство во Бугарија.

Ветото „го крена“ бугарскиот премиер Кирил Петков откако во јуни 2022 бугарското собрание усвои декларација според која, за да добие поддршка од Бугарија Македонија ефективно да го спроведе Договорот за добрососедство и да се гарантираат правата на Бугарите во Уставот. Дополнителни услови се со ништо да не се навестува и да не се толкува дека Бугарија го признава постоењето на македонскиот јазик, гаранциите за добрососедството да останат хоризонтален критериум во процесот на приклучување на Македонија кон ЕУ, како и вклучување на референци на двостраните протоколи меѓу Софија и Скопје во Преговарачката рамка.