Интензивната агенда помеѓу мешовитите македонско-бугарски работни групи продолжува и во наредните денови, во кои се закажани три средби во Скопје, од кои „главната“ е онаа на експертската група од двете министерства за надворешни работи, на која ќе се разговара за пакетот политички прашања и се очекува да се одржи по 20 февруари. Претходно, на 17 февруари во Скопје ќе се состане работната група за образование и култура, како и работната група за европски интеграции, зелена агенда и дигитализација.

Делегациите од двете МНР ќе дојдат со нови политички инструкции врз основа на разговорите што се водени на првиот состанок на 11 февруари во Софија, на кој детално биле елаборирани позициите на двете страни. Според министерот за надворешни работи Бујар Османи, позициите на двете земји и натаму остануваат различни, но утврдени се приоритетните прашања. За македонската страна тоа се идентитетските прашања во преговарачката рамка како европски решенија, а за бугарската прашањето на Бугарите во Македонија.

– Пакетот политички прашања ги опфаќа прашањата што се важни за нас, две се важни барања за нас, а тоа е прифаќање на преговарачката рамка, како што предложи Европската комисија, посебно во однос на идентитетските атрибути и почетокот на преговорите. Од страна на Бугарија се прашањата по однос на правото на самоопределување врз основа на државното уредување, говор на омраза и рехабилитација на жртви на комунизмот. Тоа се пакет прашања во кои се вклучени елементи од едната или од другата страна – рече Османи завчера на брифинг со новинарите.

Во врска со провокациите што се случуваат од двете страни, Османи е дециден дека наша цел не е ескалација, туку деескалација на односите со Бугарија, затоа што нам ни е спречен развојот преку блокадата на ЕУ.

– Имам крајна цел, а таа крајна цел е оваа држава да стане европска држава, да ги нормализира односите со соседите, зачувувајќи го тоа што е најважно за граѓаните. За тоа ми треба повеќе мудрост во делувањето отколку емоции. Оваа работа или ја ќе водите со глава или со срце. Со срце можеби ќе ви донесе некоја популарност во моментот, ќе задоволува некои наши фрустрации и емоции и незадоволства, но на крајот нема да нè води таму каде што сакаме. Затоа оваа работа мора да биде со ладна глава и жешко срце, само така ќе може да ја надминеме. Но, граѓаните може да бидат спокојни дека нема да дозволиме да се повреди ништо што е суштински идентитетски за нив – истакна Османи.

Тој повтори дека во преговорите се водат од начелото „ништо не е договорено, додека сè не е договорено“ и затоа е важно да има пакет на заемно поврзани елементи.

Во врска со барањето бугарската заедница да биде вклучена во Уставот, Османи вели дека тоа прашање е дел од разговорите, но не е решено. Според него, бугарската заедница треба да се обрати во институциите во Скопје и самите да кажат дали имаат тешкотии и дали бараат начини како да се интегрираат во системот.

Освен за политичките прашања, деновиве на средбата на работната група за образование и за култура ќе се разговара за договор за емитување бугарска телевизија на нашите кабелски оператори и за емитување на МРТВ на бугарските кабелски оператори. Како дел од обновениот дијалог и активности за интензивирање на билатералната соработка, во петокот беше реализиран и првиот лет Софија – Скопје. По средбите во Скопје на работната група за транспорт и инфраструктура е договорено редовната авиолинија Софија – Скопје да профункционира од 27 март, а до крајот на годината да биде отворен граничниот премин Клепало. Се водат разговори и за летови од Софија до Охрид, како и од Варна и Бургас до Скопје и до Охрид.

Ковачевски: Мицкоски не е искрен кога зборува за обединување

Единството и застапувањето на нашата држава се прави во законодавниот дом, а не со еднострани декларации. Со тоа само се попречува процесот на разговори што се водат со Софија во духот на европските вредности, изјави вчера премиерот Димитар Ковачевски на новинарско прашање да го коментира повикот на лидерот на опозицијата Христијан Мицкоски за национално обединување за интересите на државата.

– Таа изјава сметам дека воопшто не е искрена, бидејќи ВМРО-ДПМНЕ во изминатиот период единствено нешто што прави е креирање хистерија во однос на разговорите што се водат со Бугарија. Исто така, во рамките на подготовките за работните групи што ги формиравме со бугарскиот премиер и членовите на нивната влада заедно со нашата влада, ние упативме покана и до опозицијата, при што таа беше одбиена – рече Ковачевски.

Мицкоски завчера на партиски настан истакна дека суштински е важно кога е во прашање  државата, да има единство помеѓу партиите.

– Ударите се кон нашиот дом, кој е сè за едно семејство. Во ситуација кога нашиот дом е во прашање, единството е поважно од секоја наша внатрешна разлика што ја имаме во овој заеднички дом – рече Мицкоски.

Бучковски: Македонците немаат поблиски од Бугарите

Толку сме блиски, но изгледа им даваме многу можности да бидат сè погласни оние што не сакаат Македонија и Бугарија да бидат вистински сојузници. Реално популистите, патриотите што се тепаат во гради, се тие што во конкретните моменти кога бараме решение, прават тоа да не биде лесно – вели поранешниот специјален претставник на Владата Владо Бучковски во интервју за бугарска „Нова“.

На прашањето што ќе одговорат ако Бугарите побараат признание дека Гоце Делчев е Бугарин, Бучковски вели „ако тоа биде условот, Македонија никогаш нема да стане членка на Европската Унија“. Тој наведува дека компромисот мора да биде прифатен од општеството во Бугарија, но и од она во Македонија.