Од година во година сѐ повеќе скопјани сакаат да го разубават својот дом со  природна новогодишна елка. Сепак, ваквата можност не можат да ја искористи секој што посакува во својот дом да има природно, наместо вештачко дрво, бидејќи цената за природната елка е повисока во споредба со онаа што треба да се плати за пластичната елка.

Тука многу важен момент е и можноста пластичната елка да се користи повеќекратно, споредбено со свежата елка, која откако ќе поминат празниците, треба да се посади надвор, во двор, парк или на некоја друга јавна површина. За жал, токму поради сиромаштијата, сѐ уште на пазарот поголема е потрошувачката на пластични отколку на природни елки иако трендот полека, но сигурно се менува, а граѓаните сѐ повеќе се освестуваат еколошки.

Од ЈП „Паркови и зеленило“ се горди на тоа што заинтересираноста за купување вакви елки оди во нагорна линија, бидејќи како што велат оттаму, граѓаните ја знаат вредноста на ваквите дрвја, кои подоцна го збогатуваат и градското зеленило откако ќе бидат посадени надвор. Според надлежните од ова јавно претпријатие, заинтересираноста на граѓаните за ваков вид елка почнала да добива на интензитет во последните две до три години.

– Продажбата на природни елки е значително зголемена последниве години. Само минатата година во претпразничниот период се продадоа околу 200 природни елки, од кои најбарани од страна на физичките и правни субјекти беа големите елки со висина од 1,8 до 2,5 метри. Состојбата со пандемијата на ковид-19 и минатогодишното купување токму на елки со оваа висина, кои годинава ни изостануваат, се одрази на продажбата иако сме задоволни и очекуваме во претпразничниот период уште повеќе да се зголеми континуитетот на купување природни елки – објаснуваат од ЈП „Паркови и зеленило“.

Оттаму велат дека, граѓаните најчесто бараат поголеми елки што се продаваат по цена од 1.860 денари, но поради моменталната ситуација, токму ваквите елки оваа година ги нема во продажба. Потоа, граѓаните но и правните лица, купуваат елки со висина од 80 см со 1,2 метри, кои можат да се набават по цена исто така од 1.860 денари, како и елки во саксии (контејнерски) со висина од 40 см до 50 см, кои се продаваат по симболична цена од 700 денари.

– Ги покануваме граѓаните да дојдат да ги посетат продажните расадници на „Флораком“ ДООЕЛ во кругот на ЈП „Паркови и зеленило“ – Скопје. Ние природните елки ги продаваме со бусен. Оттука, неминовно им посочуваме на купувачите доколку се во можност, да го продолжат животниот тек на природните елки, со тоа што по завршување на празниците, да ги засадат во своите дворови или на јавните зелени површини – велат од ЈП „Паркови и зеленило“.

Од претпријатието објаснуваат дека постојано се отворени за совет околу негата што треба да ја добие една природна елка која поминала одреден период на собна температура и околу тоа како дрвото соодветно да се насади, притоа да не биде оштетено за да порасне во големо дрво.

– Кога природната елка е во затворена во просторија, најмногу на собна температура до 20 Целзиусови степени, потребно е само редовно еднаш неделно да се полева, а за поголемо задржување на свежината на зимзелените гранчиња, препорачливо е и редовно оросување на гранчињата со вода. Имено, препорачуваме и при процесот на засадување на елката во надворешната околина, преодот од собна на надворешна температура да се изврши внимателно. Потребно е прво неколку денови да се овозможи простор за прилагодување на елката на надворешната температура. Воедно, најпрепорачливо е засадувањето на елката во надворешна средина да се направи во најтоплиот дел од денот за да се овозможи нејзино најсоодветно прилагодување на надворешните услови – ја објаснуваат постапката за засадување на природната елка по завршувањето на празниците од ЈП „Паркови и зеленило“.