Празничните новогодишни денови се уникатни по декорациите и украсувањето, особено на новогодишната елка. Токму во обид да си го разубават својот дом, но и местото каде што работат, скопјани од година во година сѐ почесто се одлучуваат своите подароци да ги стават под природна накитена елка, наместо под пластична како што тоа беше случај порано.

– Граѓаните сѐ повеќе сакаат и се заинтересирани за тоа како и во кој стил ќе ја украсат својата елка. Во последниве неколку години заинтересираноста е доста зголемена за купување токму на природни елки и може да кажеме дека скопјани сакаат да купуваат природни елки за Нова година – информираат од ЈП „Паркови и зеленило“ од каде сите заинтересирани граѓани можат да си набават природна елка во големина која им одговара.

Сепак, за жал, има и луѓе на кои нивните финансии не им дозволуваат секоја година да набавуваат природно дрвце, па поради тоа, со години, па и со децении се „принудени“ да китат една иста елка.

Според информациите добиени од ова јавно претпријатие, цената на природнните елки зависи од големината на елката.

– Цената на нашите елки е 1.800 денари со висина до 1,5 метри од видот lat.picea excelsa. Исто така, во продавницатe на Флораком ДООЕЛ сè нудат и новогодишни икебани и декорации како дел од овогодинешниот продажен асортиман – објаснуваат од ЈП „Паркови и зеленило“.

Граѓаните кои сакаат подолго да уживаат во свежината и мирисот кој го шират игличките на природната елка додека се наоѓаат во домот, доколку сакаат, имаат време, но и соодветни услови за чување, можат да се обидат еднаш купената природна елка да ја одржуваат сѐ до следната календарска година кога ќе можат и повторно да ја накитат.

– Доколку има соодветни услови и елката редовно се одржува, се оросува, односно полева и чува на умерена собна температура може да издржи до година – две во саксија. Но, сепак се препорачува истата да го продолжи својот природен тек и доколку има можност да се засади во дворот, градината или пак на јавна површина – советуваат од претпријатието.

Откако ќе помине Новата година и целата таа еуфорија ќе спласне, многумина кои си набавиле природна елка за најлудата ноќ, немаат доволно информации што понатаму да направат со свежото дрвце и како да направат  тоа да има подолг животен век. За одговор на сите овие прашања, многу често скопјани знаат да побараат стручен совет токму од вработените во ЈП „Паркови и зеленило“.

Дел од нашите купувачи ни се обраќаат за помош, при што наши екипи секогаш стручно ги советуваат и им помагаат на купувачите во овој дел за тоа како треба да ги засадат елките, каде е најдоброто место, како понатака да се одгледувааат и слично. Елката бара поголема површина за садење, бидејќи може да порасне во височина и над 50 метри и во широчина од 10 метри. Се копа дупка со одредена големина и во неа се засадува елката. Во зимскиот период таа се полева умерено, додека во летниот период поинтензивно. За една мала елка да порасне во височина од 1.80 до 2 метри потребен е период од 8 до 12 години, што значи дека за да постигне некоја биолошка зрелост потребно е да минат низа генерации – објаснуваат од претпријатието.

Кога станува збор за тоа, за кој тип елка најмногу се заинтересирани скопјани, според надлежните, тоа најчесто се помалите елки кои всушност се и полесни за транспорт, но и за одржување.

– Заинтересираност има, и тоа најбарани се помалите елки, кои потоа им ги красат дворовите на граѓаните. Но, природни елки повеќе купуваат од институциите, како на пример експозитури на банки и се поставуваат во канцеларии, а има и такви кои ги подаруваат на своите вработени и по завршување на празниците овие институции во координација со претпријатието ги засадуваат елките на отворени јавни површини со што се продолжува векот на елката – заклучуваат од ЈП „Паркови и зеленило“.