Вкупно 41 диносаурус во природна големина, веќе се поставени во новиот Дино парк, информираат од Скопската зоолошка градина. Во моментов, екипи работат на терен околу доуредувањето на просторот после што, во Скопје и официјално ќе биде пуштен во употреба ваквиот уникатен парк, кој според надлежните ќе биде доволно интересен за да го посетуваат и најмладите, но и оние повозрасните. Според нив, со овој Дино Парк ќе се добие уште едно интересно место каде што скопјани, но и посетителите од внатрешноста како и оние од странство, квалитетно ќе го поминуваат слободното време.

Посетителите ќе имаат можност да ги разгледаат диносаурусите кои се движат и испуштаат звуци, идентични како оние што ги правеле и вистинските диносауруси, кои некогаш оделе по земјата.

Сепак, кога точно ќе биде отворен новиот парк за посетителите, од Зоолошката градина сѐ уште немаат конкретен датум, поради настанатата состојба со коронавирусот.

– Се зависи од тоа каква ќе биде здравствената состојба во земјава за отворањето на Дино паркот. Тој за посетители ќе биде отворен или зимава или на пролет – велат од Зоолошката градина.

Сите што ќе сакаат да ги видат диносаурусите, ќе треба да платат влез од 50 денари, цена за која како што велат од Зоолошката градина е исклучително ниска кога станува збор за ваков тип на парк во светот.

За да се олесни пристапот во новата атракција во Скопје, планирано е да има два влеза. Во новиот Дино парк ќе може да се влегува и од Градскиот парк и од Зоолошката градина.

Средствата за реализација на овој проект ги обезбеди Град Скопје.

– Од Градот Скопје добивме 325.000 евра за комплетна изградба на Дино паркот. Тие средства се вложени далеку пред пандемијата, односно паркот почна да се гради во октомври  2019 година – информираат од Зоолошката градина.

Оттаму додаваат дека тие постојано се работат на тоа да ги подобрат условите во кои живеат  животните, но и да донесат нови и атрактивни животни и птици. Сепак, како што велат од ЗОО, поради ситуацијата со ковид-19, организацијата и транспортот на животните оди многу тешко. Поради тоа сѐ уште се во исчекување на пингвините.