Скопјани што користат јавен превоз денеска за првпат по подолго време можеа да стигнат на работа, на училиште и каде и да тргнале без проблеми, без долго чекање автобус и без гужви во автобусите. Автобуси имаше на неколку минути, затоа што во сообраќај се вклучија и околу 150 приватни.

До кога ќе трае ваквата состојба не се знае, затоа што приватниците се вратија во нормален превоз, како што велат, за да покажат добра волја кон граѓаните и со очекување дека Градскиот совет ќе им го прифати барањето за зголемување на цената за изминат километар.

По вонредната седница на Советот на Град Скопје во четвртокот, почувствувавме дека сме им потребни на граѓаните, но почувствувавме и дека постои расположение да се излезе во пресрет на нашите барања. И градоначалничката Данела Арсовска во трите предлози го спомена и нашиот проблем. Поттикнати од тоа се договоривме од денеска да се вклучиме во сообраќај и да видиме што ќе се случува понатаму – вели Јовица Зафировски од „Јофи бус“ ДОО, една од трите компании што вршат приватен превоз во Скопје, на прашањето на „Слободен печат“ зошто приватните превозници не возеа кога ЈСП остана без нафта, туку дури од вчера.

Тој вели дека состојбата во која се наоѓаат е многу тешка, дека со месеци не им се исплаќа навреме за услугата што ја вршат, дека со тие пари треба да набават и нафта, да ги платат возачите и да се одржуваат автобусите. Како што тврди Зафировски, исплатено им е заклучно со мај, а исплатата е извршена во септември.

Дека ЈСП доцни со исплатата на приватните превозници, утврдија и ревизорите, кои во годишниот извештај посочија дека заклучно со 31 декември 2023 година претпријатието има неподмирени обврски во вкупен износ од нешто повеќе од 93 милиони денари или 1,5 милиони евра што може да создаде дополнителни проблеми во работењето на правните субјекти ангажирани во јавниот превоз.

Од друга страна, градоначалничката Данела Арсовска на вонредната седница тврдеше друго, дека до пред три месеци ЈСП немало долг кон приватниците, а дека сега сакаат да им биде платено нешто што не го испорачале.

Три компании во името на приватните превозници имаат склучено договори со кои испорачуваа услуга на градот до пред три месеци. Пред три месеци, со салдо нула денари долг меѓу ЈСП и приватните превозници во еден момент тие одлучија да престанат да сообраќаат затоа што не биле задоволни од цената што ја добивале од јавното претпријатие поврзано со нивните трошоци за услугата што ја испорачувале. Потоа, слушнав од нив некаква промена на ставот, дека не престанале да возат затоа што била проблем цената, сега велат дека сакале да бидат платени за услуга што не ја испорачале. Значи не може да е проблем да не се платени за нешто што не го дале на граѓаните. Тоа не е проблем, тоа е креирање проблем затоа што тој не постои – рече Арсовска од говорницата.

Иницијативата за зголемување на цената за изминат километар која ЈСП им ја плаќа на приватните превозници беше ставена, а потоа повлечена од дневен ред на последната седница на Советот, со образложение дека треба да се доработи, но не е предвидена ниту за наредната седница, која треба да се одржи в среда.

Сепак Зафировски е оптимист.

 Советниците ја имаат иницијативата, верувам дека ја разгледале, дека дискутирале и дека постои добра волја да се изгласа, а потоа за сѐ друго можеме да се договараме. Доколку тоа се случи, доколку се зголеми цената, ние се обврзуваме да ги обновиме и да ги модернизираме автобусите и да им пружиме на граѓаните услови какви што заслужуваат – вели Зафировски.

На прашањето има ли рок до кога ќе чекаат и до кога ќе возат како денеска, тој објаснува дека не може да се зборува за рокови, но дека имаат трпение и сакаат да придонесат за нормален јавен превоз, но доколку и другите надлежни покажат разбирање за ситуацијата во која тие се наоѓаат и да се најде заеднички прифатливо решение.

Во меѓувреме, автобусите на ЈСП возат со „позајмена“ нафта од државите резерви додека претпријатието не склучи нов договор за набавка на гориво. За тоа има време десетина дена, затоа што нафтата што ја одобри Владата ќе потрае само две недели.

На наредната седница на Советот повторно треба да се гласа за предлозите од Арсовска за набавка на нови автобуси и реализација на проектот за брз автобуски превоз, за кои досега две години нема поддршка од мнозинството советници. Речиси е неверојатно дека новата седница ќе донесе и поинакви размислувања на советниците, пред се на оние од ВМРО-ДПМНЕ и коалицијата.

Меџити: ЈСП утре ќе добие шест електрични автобуси, а Владата ќе купи уште 120

Премиерот Христијан Мицкоски деновиве најави дека Владата ќе набави помеѓу 100 и 120 електрични автобуси, од кои најголемиот дел би биле наменети за Скопје. Како што рече, техничката документација веќе се подготвува, а тендерот се очекува да се распише до крајот на годината.

И доколку тоа сѐ така се случи, ќе треба време додека новите автобуси станат дел од скопскиот јавен превоз, па на граѓаните им останува да се надеваат дека ќе потрае она што вчера се случуваше во градот – да возат и автобусите на ЈСП и на приватните превозници без оглед на тоа во каква состојба се.

Додека стигнат нови автобуси, доволно е барем да има редовен превоз, да се избегнат гужвите и долготрајното смрзнување по автобуските станици.

Приватните превозници се вклучуваат во сообраќај