Задоцнетите врнежи со снег, многу инфраструктурни проблеми и недостиг на неопходните големи инвестиции го отежнуваат зимскиот туризам во Македонија. Упатените од овој сектор велат дека без голема волја од државата, без голема финансиска помош и издржани студии и проекти, како и нивно имплементирање, Македонија нема да може да се пофали со зимскиот туризам. Дури, една поглобална слика и споредба со подамнешни времиња, покажува дека порано бевме поатрактивни и кај домашните, но и кај регионалните гости.

Огњан Цигоски, директор на „Ресорт Маврово“, кој управува со ски-центарот и со три хотели, вели дека од финансиски аспект ова ќе биде тешка година за бизнисот.

– Сезоната на скијање конечно тргна. Но, немаше снег кога децата беа на распуст и кога вообичаено имавме најмногу гости. Би било добро за туризмот да се размислува распустот на децата да не трае две недели на почетокот на јануари, туку да имаме скалест распуст, со цел да имаме повеќе гости, но и повеќе сместувачки можности – вели Цигоски.

Тој вели дека во трите хотели успеваат да се наполнат во викендите, но во работните денови тие се полупразни.

– Покрај домашните гости, традиционално имаме гости од Косово, Јужна Србија и од Албанија. Во Маврово сега има снег, а и температурите дозволуваат правење на вештачки снег – вели Циговски.

Бизнисменот Нехар Селим веќе неколку години како се откажа од стопанисување со хотел во Маврово. Тој вели дека треба да се направат многу напори од сите чинители во државата и да се вложат многу пари за да се привлечат повеќе гости, да има повеќе содржина и така и на хотелиерите да им биде исплатливо да управуваат со хотели.

– Кога зборуваме за нашиот зимски туризам, обично се кажува дека нашите хотели се скапи. Но, математиката е таа. Треба да се ангажира кадар уште од октомври. Потоа, струјата , водата, одржувањето на хотелите е многу скапо. И кога тоа ќе се подели со број на гости и ноќевања се добиваат тие цени – објаснува Селим.

Како човек што е во туризмот многу години, вели дека е добро само да ги следиме светските искуства на оние што добро работат. И тој потенцира дека е многу важно да се размислува за скалест распуст на децата.

Селим е сопственик и на туристичката агенција „Нехар травел“, преку која повеќе години носи туристи на скијање во Франција.

– За 550 евра носиме туристи на познати скијалишта во Франција со ски-патеки од 350 до 600 километри. Во аранжманот е вклучен превоз, сместување и 6 дневни ски-билети. Имаме многу интерес. Носиме по стотина гости во тура и веќе ги продаваме последните соби за март – вели Селим.

Тој објаснува дека токму овие скијалишта во Франција се добар пример како може да се направи успешна приказна за зимски центар.

– Таму на 2.400 метри надморска височина без проблем оди автобус. Има огромен паркинг. Во сите познати ски-центри, постојано циркулираат бесплатни автобуси до скијалиштата, па каде и да сте сместени, лесно ќе стигнете до нив. Постојано се инвестира во нови гондоли. Но, тоа ниту еден приватен инвеститор не може да го направи сам. Затоа мора да инвестира и државата – ги сподели искуствата со нас Селим.

Во изминативе недели, пак, Попова Шапка привлече многу гости. Но, тие се соочија со стариот најгорлив проблем за овој скијачки центар, а тоа е паркингот. Според најавите од италијанскиот инвеститор „Техноалпин“, треба да проработи жичарницата од Тетово до ски-центарот. Но, додека се чека реализација на проектот, реално нема решение за сите љубители на белиот спорт и зимските прошетки.