Фудбалерот на Јувентус, Николо Фаџоли (22), кој прв беше откриен дека учествувал во голем скандал со обложување во италијанскиот фудбал, доби казна. Фаџоли доби седум месеци забрана за играње фудбал, пишува италијански „Скај Спорт“ и додава дека оваа информација наскоро ќе биде и официјално потврдена.

Да потсетиме, Фаџоли на почетокот на минатата недела призна дека се обложил на фудбалски натпревари. На спортистите во Италија им е забрането да се обложуваат на натпревари организирани од Италијанската фудбалска асоцијација, УЕФА и ФИФА и им е забрането да уплатуваат облози директно или индиректно.

Сандро Тонали (23) и Николо Ѕаниоло (24), италијански репрезентативци и играчи на англиските клубови Њукасл и Астон Вила, се во центарот на аферата заедно со Фаџоли.

Казната на Фаџиоли се очекува да биде една од најблагите со оглед на тоа што од првиот момент соработувал со истражителите и открил некои клучни информации за истрагата. Се предвидуваше дека ќе добие забрана од 10 до 18 месеци, но на крајот помина со помала суспензија.

Од друга страна, и Тонали се согласил да им каже на истражителите сè што знае за обложувачката афера, но се очекува да се соочи со повисока казна. Според „Ла Гаѕета дело Спорт“ се очекува тој да добие забрана за играње фудбал околу 18 месеци.