Повеќе од 150 добитници на Нобеловата награда и Светската награда за храна овој месец испратија отворено писмо во кое алармираат дека се потребни многу поголеми инвестиции во истражувањето, производството и дистрибуцијата на храната за да се спречи глобалната криза со храната во наредните децении.

Во писмото се наведува дека околу 700 милиони луѓе денес се соочуваат со „несигурност околу храната и очајна сиромаштија“, но дека доколку не се направат „невидени напори“ за производство на повеќе храна, многу повеќе луѓе ќе бидат во таква ситуација, пред сè поради климатските промени, војните и пораст на населението.

„Колку и да е тешко и непријатно да се замисли, човештвото оди кон средината на векот каде што несигурноста во храната ќе биде уште поголема, а светот уште понестабилен отколку што е денес“, се вели во писмото потпишано од 153-ца добитници на двете награди.

Тие посочуваат и дека климатските промени ќе ја намалат продуктивноста на основната храна и дека се потребни значителни зголемувања за да се нахрани светската популација која ќе порасне на 1,5 милијарди луѓе до 2050 година.

„Не сме на пат да ги задоволиме идните потреби за храна. Не сме ни блиску“, се додава во писмото.

Во писмото се истакнува дека драстичното зголемување на финансирањето за истражување, заедно со поефикасни начини за споделување информации и дистрибуција на храна, може да спречи криза со глад.

Добитникот на Нобеловата награда за физика за 2011 година, Брајан Шмит, изјави дека потребата за драстично зголемување на производството на храна во наредните децении е голем предизвик, но дека проблемот може да се реши преку соодветно финансирање за истражување и глобално лидерство.

Шмит рече дека се надева оти владите во САД, Европа и други земји можат да се посветат на решавање на проблемот, но тој мисли дека приватните групи треба да преземат водство во финансирањето на почетните чекори што ќе го привлечат вниманието на политичарите и ќе ги поттикнат на акција.