Членовите на Советот на јавни обвинители со седум гласа „за“ и еден „против“ ја одбија жалбата на скопскиот виш јавен обвинител, Мустафа Хајрулахи и го потврдија решението на републичкиот јавен обвинител, Љупчо Коцевски, Хајрулахи да биде суспендиран додека трае кривичната постапка против него.

Дискусијата на членовите беше затворена за јавноста, а по еден час дебата се гласаше јавно и единствено „против“ се изјасни Кети Петкова која беше избрана за член на Советот минатата година, како предлог од Собранието.

Уште пред да се гласа, Петкова побрза да каже дека сака јавно да каже зошто ќе гласа против решението на Коцевски.

Таа имаше спремен говор и јавно кажа дека Коцевски со тајмингот за суспензија на Хајрулахи направил поголема злоупотреба отколку Хајрулахи, со оглед на тоа што кривичната пријава од вработените до нивниот шеф за малтретирање била поднесена уште во јули.

-Републичкиот обвинител го крши Законот за јавно обвинителство, задира директно во правата и самостојноста на јавните обвинители. Од формален аспект, постоење и водење на кривична постапка значи суспендирање на обвинителот против кого се води постапката, меѓутоа, Советот, освен формалниот аспект, треба да се занимава со дејствијата што претходат на постапката. Недопустливо е повод за суспензија да биде кривична пријава за мобинг, рече Петкова.

Таа својот говор го заврши со познатиот цитат од Мартин Нимоле и поентираше „кога ќе дојдат по нас, ќе нема кој да реагира“.

Сите други членови ја поддржаа одлуката на Коцевски, но јавно не ја образложија, туку кажаа дека нивните мислења ќе ги има во записниците.

Уште пред да биде избрана за член на Советот на јавни обвинители, за Петкова беше објавено дека била шест години обвинител, но нејзината обвинителска кариера завршила во 2009 година. Таа тврдеше дека не била реизбрана, односно не и бил трансформиран мандатот во траен, додека Советот тврдеше дека функцијата и престанала поради нестручно и несовесно работење.

Во Советот влезе како адвокат, а според информациите на „Слободен печат“, таа била адвокат во предметот „Поштенска банка“, случај кој е предмет на ревизијата што ја спроведува Републичкото во Виштото обвинителство со кое раководеше Хајрулахи.

Овој предмет што го отвори поранешното Специјално јавно обвинителство веќе не е активен, иако во него беше утврдена штета од седум до осум милиони евра. И во овој предмет Вишото јавно обвинителство ја повлекло жалбата и овој е еден од пропаднатите предмети.

Инаку, Хајрулахи и вишиот јавен обвинител, Јован Цветановски имаат поднесено две претставки до Советот на јавни обвинители за наводен притисок што им го вршел Коцевски за предметот за „бонусите“ за обвинителите од поранешното СЈО, односно барал од нив да го затворат.

Советот побарал по однос на овие обвинувања да се изјасни Коцевски.

-Побаравме од јавниот обвинител на Република Северна Македонија да се произнесе по однос на наводите. Откако ќе го добиеме произнесувањето од јавниот обвинител тогаш ќе ги разгледуваме и ќе одлучуваме, рече претседателката на Советот на јавни обвинители – Душица Димитриеска.

Хајрулахи беше суспендиран минатата недела откако штипското обвинителство отвори истрага против него за малтретирање на дел од вработените и злоупотреба на службената положба и овластувања.