Иницијативата „Сите за Палестина“ во писмо испратено до претседателката Гордана Сиљановска Давкова и министерот за надворешни работи, Тимчо Муцунски оцени дека одбивањето на Македонија да ја признае Палестина претставува соучесништво во геноцид. Во писмото, организацијата истакнува дека признавањето на Палестина не е „импулсивен“ или „емоционален“ чин, туку е во согласност со меѓународното право и историската правда.

Не е време да реагираме емотивно, вели Муцунски за признавањето на Палестина: „Мораме да сме дисциплинирани и внимателни“

Според иницијативата, Генералното собрание на ООН уште во 2012 година ја призна Палестина како држава-набљудувач, а денес повеќе од 140 држави ја имаат признаено. Македонија, пак, со своето одбивање останува во малцинството, заедно со земји кои систематски го блокираат правото на самоопределување на Палестинците.

Иницијативата потсетува дека како членка на ООН, Македонија има обврска не само да не врши геноцид, туку и активно да го спречува. Признавањето на Палестина, тие велат дека е една од мерките со кои може да се заштити палестинскиот народ од апартхејд и окупација.

Организацијата повикува Владата и Министерството за надворешни работи: да ја признаат Палестина, да прекинат дипломатски односи со држави кои овозможуваат геноцид и да воведат санкции против Израел, на економски, образовни и културни нивоа.

– Муцунски признава дека позицијата на Македонија се диктира од „стратешките партнери“ како САД – држава која ја вооружува и поддржува израелската окупација. Тоа не е дисциплина, туку покорност на туѓи интереси. Во исто време, неколку европски земји (Шпанија, Ирска, Норвешка, Словенија) ја признаа Палестина. Шпанија и Колумбија презедоа активни мерки и санкции за да го спречат геноцидот. Дали нивната одлука е „импулсивна“? Италија испрати поморска помош за Глобалната Сумуд Флотила хуманитарна цивилна мисија, која Израел ја бомбардираше три пати во последниве 2 недели – се вели во писмото.

Молкот и неодлучноста не се дисциплина, туку срам за меѓународната репутација на Македонија и соучесништво во едно од најголемите историски злосторства, додаваат тие.

Зошто Палестина мора да се признае токму сега?