Владата најави дека септемвриската пензија ќе стигне со фиксен додаток од 1.000 денари за сите пензионери, а исплатата почнува следната недела.

Премиерот Христијан Мицкоски вели дека ова е „првичната корекција“ во рамки на новиот модел за линеарно зголемување, со втора „рата“ од уште по 1.000 денари напролет. Планот, според него, треба да донесе вкупно 7.000 денари повеќе по пензионер — над ветените 5.000 во кампањата.

Ова е третпат за една година пензиите да растат со фиксен износ: во септември 2024 тие беа зголемени за 2.500 денари, толку и во март 2025 — сега следи 1.000, па уште 1.000 на пролет.

Аргументите на власта за линеарното покачување беа дека на тој начин повеќе растат најмалите пензии, но со оглед на покачувањата на цените на храната и основните производи, илјада денари повеќе тешко дека ќе значат многу и за социјално најзагрозените пензионери.

Иако е најавен пред повеќе месеци и објаснет како дел од тековен план, потегот на власта за покачување на пензиите непосредно пред избори, и кога го најавија наиде на критики кај дел од експертите, кои го оценија како предизборен маркетинг со државни пари.

Буџетот, а не придонесите го полнат пензискиот систем – Септемвриското покачување на пензиите нема да биде линеарно