Суровата храна подразбира готвење на плодовите на температура не повисока од 50 Целзиусови степени, како и јадење овошје, зеленчук, алги, ’ркулци, интегрални житарки, мешунки, семки, суво овошје и јаткасти плодови, а целта на тоа е подобрување и чување на здравјето

Освен вегетаријанската, веганската и макробиотската храна, во последниве години актуелен е уште еден нов вид консумирање храна, кој се нарекува најдобар, најздрав, но и нешто покомплициран прехранбен тренд. „Raw food“, или јадењето сурова храна, која се базира на принципот плодовите да не се изложуваат на температура над 50 Целзиусови степени, бидејќи само така можат да се сочуваат ензимите во растенијата и со тоа да се овозможи најдобра апсорпција и користење на нутриентите од храната.

Варената храна се смета за празна, бидејќи со загревањето се губат и менуваат структурата на витамините, минералите, ензмите и влакната. Треба да се има предвид дека јадењето сурова храна не е прикладно за доенчиња и за деца.

Што може да се јаде?

Спроведувањето на исхрана со сурова храна не е едноставно, бидејќи треба време да се стекнете со рутина која подразбира многу лупење, сечкање, цедење, пасирање и дехидрирање на плодовите. Освен овошје и зеленчук се јадат алги, ’ркулци, интегрални житарки, мешунки, семки, суво овошје и јаткасти плодови. Употребата на шпорет и рерна е многу ограничена. За подготовка на мешунки и житарки што не можат да се јадат сурови, се користи киснење во вода, по што тие се во состојба што може да се употребува.

Јадете сезонски плодови

Една од многу важните работи е да ги следите плодовите што се достапни во текот на годината. На тој начин телото се навикнува во зимата дека доаѓа време за потешка храна, додека летото е резервирано за лесни плодови.

Уште едно правило на јадењето сурова храна е – колку е потопло времето, плодовите се посочни и можете да ги јадете повеќе, а колку е поладно, плодовите се потешки и повеќе заситуваат, па не можете да ги јадете многу.

Органските плодови се главен избор

Ваквиот стил на исхрана, со мудро планирање, може да биде корисен за здравјето бидејќи изобилува со благотворни состојки како прехранбени влакна, повеќе витамини и минерали, посебно антиоксидативни фитохемикалии.

Но, истовремено е сиромашен со Б12, калциум, железо и омега три масни киселини. Освен што плодовите треба да се органски одгледани, треба да ги надоместите состојките што ви недостигаат преку јадење повеќе тофу, мешунки, бадеми (ќе обезбедат доволно железо), барем осум порции зелка, соја и смокви (за доволно калциум), житарки и соино млеко збогатено со витамин Б12, ленено семе и ореви (обезбедуваат доволно омега-3 масни киселини).