Сирија во септември ќе ги одржи своите први парламентарни избори откако Башар ал Асад беше соборен во декември минатата година.

Привремениот претседател Ахмед ал Шара ги задржува извршните овластувања, а се очекува изборите да бидат чекор кон нов устав и политичка транзиција, пишува ДВ.

Претседателот на Изборната комисија, Мохамед ал Ахмад, за државната новинска агенција САНА изјави дека изборите ќе се одржат во неделата од 15 до 20 септември. Новиот парламент ќе има 210 пратеници, од кои 140 ќе бидат избрани преку регионални изборни комисии, додека преостанатите 70 ќе бидат назначени од привремениот претседател Ахмед ал-Шара.

Ова е првиот парламент по повеќе од една деценија граѓанска војна и соборување на Башар ал-Асад. Претходното Претставничко тело имаше 150 членови.

Според Уставната декларација потпишана од ал-Шара во март, мандатот на новоизбраниот парламент ќе трае три години, додека не стапи во сила нов устав.