Давиде Анчелоти, синот на славниот Карло Анчелоти, доби историска шанса да ја започне својата самостојна тренерска кариера и тоа не каде било, туку на клупата на актуелниот шампион на Бразил и Либертадорес, Ботафого. Младиот стратег ќе наполни 36 години за само три недели, а веќе е промовиран како нов предводник на еден од најтрофејните клубови во Јужна Америка.

Анчелоти беше на чекор до преземање на шкотскиот Ренџерс, но сепак го избра бразилскиот предизвик. Зад него се девет години искуство како помошник на неговиот татко во фудбалски гиганти како Баерн Минхен, Наполи, Евертон и Реал Мадрид. И по преминот на Карло Анчелоти во бразилската селекција, Давиде остана негов асистент – улога која ќе продолжи да ја извршува паралелно со работата во Ботафого.

Бразилскиот шампион сезоната ја започна со Артур Жорже, кој по освоените трофеи се пресели во Катар. Него го замени Ренато Паива, но експериментот траеше кратко и по неколку месеци и покрај победата над ПСЖ во групната фаза на Светското клупско првенство, Ботафого испадна од Палмеирас и Паива доби отказ.