Синдикатот СУТКОЗ при ССМ бара советниците во Советот на Град Скопје да побараат од градоначалничката Данела Арсовска да го разреши в.д директорот на „Водовод и канализација“ Марјанчо Митовски, кој, според нив, е потенцијална опасност за вработените во претпријатиетот и за граѓаните на Скопје. Истовремено, синдикалците бараат од градоначалничката, Управниот одбор и директорката на ЈП „Комунална хигиена“ да се продолжи ангажманот на 113 лица, со кои деновиве се прекинати договорите за работа.

Претставниците од Синдикатот СУТКОЗ и од синдикалните организации на јавните претпријатија „Водовод и канализација“ и „Комунална хигиена“ остварија средба со претседателот на Советот на Град Скопје, Трајко Славевски и со координаторите на советничките групи во Советот, поради тоа што Арсовска одбива да се сретне со нив.

На состанокот координаторите на советничките групи биле запознаени со состојбите во јавните претпријатија, односно дека во „Водовод и канализација“ се спроведува постапка за штрајк, кој треба да започне веднаш по истекот на законските рокови, поради непочитувањето на законот и на колективните договори во врска со правата од работен однос на работниците. Тие укажале дека в.д.директорот не ги почитува правата на вработените, се однесува самоволно и дискриминаторски, дека на вработените не им се исплаќаат придонесите од задолжително социјално осигурување и придонеси за здравствено осигурување, поради тоа што вработените во ЈП Водовод и канализација се плашат за нивната егзистенција, како и на ред други неправилности.

Синдикатот ги запозна претседателот на Советот и градските советници и за состојбите во „Комунална хигиена“, каде на 113 работници на 4 ноември не им се продолжува ангажманот во претпријатието без притоа да има обрзаложение за причините поради кои повеќе од 113 семејства од 4 ноември се оставени без егзистенција и без работа.

Синдикалната организација на СУТКОЗ при ЈП „Комунална хигиена“ при ССМ реагира поради тоа што овие вработени навремено, совесно и редовно ги извршувале своите работни задачи на работните места за кои биле ангажирани, редовно доаѓале на работа и со нивното неангажирање се доведува во опасност нормалното функционирање на претпријатието, особено поради тоа што најголем дел од овие работниците извршуваа работни задачи поврзани со дејноста на претпријатието, со што во наредниот период значително ќе се придонесе до влошување на хигиената на главниот град Скопје – соопштуваат од Синдикатот.