Пописот е спроведен во согласност со сите стандарди што ги пропишуваат Обединетите нации (ОН), а кои ги прифаќа Евростат и апсолутно не гледам никаква можност Уставниот суд да ја прифати иницијативата на пратеникот Скендер Реџепи за оспорување на методологијата на спроведувањето на пописот од 2021 година, дециден е поранешниот директор на Државниот завод за статистика (ДЗС) Апостол Симовски. Ексдиректорот смета дека иницијативата на Реџепи е од политички интерес. Поентата на иницијативата на Реџепи е дека противуставна е поделбата на населението на резидентно и нерезидентно.
Симовски потсетува дека Законот за попис бил оспорен од Левица пред почетокот на пописот и дека Уставниот суд се изјаснил дека нема никаква основа за такво нешто.

– Тоа што со сигурност го тврдам е дека пописот е спроведен во согласност со сите стандарди што ги пропишуваат Обединетите нации, а ги прифаќа Евростат, а кои се однесуваат на Европа и пошироко. Во овие стандарди што се нарекуваат препораки, точно е дефинирано што е цел на пописот. Нерезидентното население не е задолжителна цел во пописот, затоа што тие лица што не живеат во земјата што врши попис се дел од пописот во земјата во којашто живеат. Во спротивно, би имало двојно попишување и никогаш со точност не би можела да се утврди фактичката состојба. Пописот треба да биде фотографија. Вие или сте на таа фотографија или не сте, не може да бидете и да не бидете. И затоа се прави во даден момент, има критичен момент на пописот, тоа е најчесто на полноќ на соодветен датум и се попишува во тој момент кој бил тука. Тоа е правило што важи за сите земји во сетот – вели Симовски за „Слободен печат“.

Тој објаснува дека во Уставот нема одредба каде што се споменува пописот. Уставот дозволува на секој поединец да се изјасни или да не се изјасни за својата етничка и религиозна припадност. Симовски додава дека функцијата на пописот е да се знае кој точно тука живее, затоа што институциите, бизнисот, здравството, образованието треба да знаат колку луѓе живеат на одредена територија за да може да ги организираат своите активности и планирања за во иднина.

– Ако резидентното население го ставите заедно со нерезидентното и тоа покаже, на пример, дека во некое населено место има голем број деца, градите училиште, а реалната слика е дека нема деца. Тоа значи дека вложувате без никаква потреба. Целта на пописот е да даде можност на тие што планираат развој во која било смисла да имаат точна претстава за колку луѓе да планираат. Апсолутно не гледам тука каква било можност, која и да е институција, па и Уставниот суд, да го прифати ваквото барање зашто е без никаква основа. Пред почетокот на пописот имаше изјава од портпаролот на ЕУ дека нашата методологија е целосно усогласена со стандардите што ги пропишува Евростат, а кои се стандарди на ОН. Не гледам апсолутно никаква причина за иницијативата, но политиката секогаш сакала да употребува односно злоупотребува сè што и стои на располагање – вели Симовски.

Реџепи три години по пописот ја поднесува иницијативата зашто, како што вели, сега се чувствуваат последиците, бидејќи сега вработувањата и распределбата на парите во општините се вршат врз тие бројки од пописот, односно само според резидентното население. Тој смета дека се повредени членовите 8, 9 и 51 од Уставот и членовите 6, 7 и 17 од Законот за попис.

– Законот е донесен во Собранието, методологијата е во надлежност на Заводот за статистика. Последиците од тоа не беа познати додека не дојде моноетничката власт со моноетничкиот и антиалбанскиот легитимитет, каков што е оваа власт во моментов. И да беше пропуст, без сомнение беше пропуст на претходната влада, но тоа не значи дека овој пропуст не треба да се коригира. Уставниот суд има моќ да ги исправа направените пропусти и грешки. Подобро подоцна отколку никогаш да се исправи пропустот и грешката – изјави пратеникот Реџепи.

Реџепи ја оспорува методологијата на пописот: Противуставна е поделбата на резидентни и нерезидентни граѓани