Кандидатката за претседател на ВМРО ДПМНЕ, Гордана Силјановска Давкова, синоќа точно на полноќ ја започна својата кампања пред родната куќа во Охрид.

-Кампањата за претседателски избори ја започнувам од местото каде започна мојот живот. Со ваша помош ова ќе биде почеток на крајот на една нелегитимна и мрачна власт – со овие зборови кандидатката Гордана Силјановска Давкова, точно на полноќ ја започна кампањата.

Силјановска Давкова вели дека е родена во Народна Република Македонија, но сега треба да лаже ако сака да ја смени личната карта дека била родена во Република Северна Македонија.

-Темнина насекаде, како и во државата. Посакувам светлина. Мислам дека моментов што го делам со вас, моментот на почеток на мојата кампања, ќе биде почеток на крајот на една власт- порача Силјановска Давкова.

Таа ја обвини актуелната власт дека поради нивните политики, Охрид и покрај тоа што еден од најубавите градови во светот е темен, како и дека е темна целата држава.