Земјотрес со интензитет од 5,2 степени според Рихтеровата скала е регистриран ноќеска во југозападниот брег на островот Евија во Грција, соопштија од Европскиот медитерански сеизмолошки центар (ЕМСЦ).

Потресот се случил 27 минути по полноќ по локално време, а епицентарот бил на 37 километри североисточно од Атина и на 14 километри од градот Неа Макри. Според ЕМСЦ, земјотресот бил на длабочина од 10 километри.

Земјотресот бил проследен со силен звук и почувствуван во целата област Атика, поширокиот регион на Атина.

Според грчките медиуми, засега не се пријавени повредени лица и материјална штета.

По овој земјотрес, во околината на градот Неа Стира, биле регистрирани уште неколку потреси чиј интензитет бил до 2,8 степени.