Украина е отворена за преговори за праведен мир, но клучот за примирје лежи во вршење притисок врз Русија преку санкции и меѓународна дипломатија, изјави денес украинскиот министер за надворешни работи Андриј Сибиха.

Сибиха на прес-конференцијата, по состанокот на Лублинскиот триаголник, изјави дека за да се постигне праведен мир, потребно е да се изврши притисок врз Русија, а не врз Украина, пренесува Укринформ.

Сибиха, коментирајќи ја изјавата на портпаролот на Кремљ, Дмитриј Песков, кој рече дека е потребно да се изврши притисок врз Украина за да се одржи нова рунда преговори со Русија, рече дека ваквите изјави треба да се сметаат „како дезинформации, пропаганда и прикривање на вистинската реалност“.

„Ова е целосна лага, манипулација и искривување на фактите. Украина никогаш не била, не е и нема да биде пречка за мир“, нагласи Сибиха.

Сибиха рече дека Украина „ги поздравува сите мирни напори“ на американскиот претседател Доналд Трамп и европските сојузници, „за вклучување на сите дипломатски инструменти со цел да се запре руската агресија и да се постигне праведен и одржлив мир за Украина“.

Тој додаде дека украинската страна го покажа ова во Џеда, кога безусловно го прифати предлогот на американската страна за прекин на огнот, и во Истанбул, кога руската страна испрати делегација на ниско ниво, според него, „понижувајќи ја Америка, понижувајќи ги нејзините партнери и покажувајќи дека тие нема и не се подготвени суштински да разговараат за прекин на огнот или постигнување одржлив мир“.

Сибиха изјави дека Украина е навистина подготвена „за разговори, за консултации, за преговори“ со цел да се постигне праведен мир.

Според него, „веројатно најефикасната средба“ би била на ниво на украинскиот и рускиот претседател, Володимир Зеленски и Владимир Путин, на која би присуствувале и други лидери, пред сè Трамп, европски лидери и турскиот претседател Реџеп Таип Ердоган“.

„Подготвени сме за такви преговори во кој било формат, на која било географија, со цел да се постигне праведен мир. Затоа, во оваа фаза, примирјето е фундаментален чекор. А за да се случи примирје, треба да извршиме притисок врз Русија, пакети санкции. Ова ќе ни овозможи да го добиеме посакуваниот резултат за сите – праведен мир“, нагласи Сибиха.

Денес во Лублин, Полска, се одржа состанок на министрите за надворешни работи на Украина, Полска и Литванија, на кој присуствуваа Сибиха, Радослав Сикорски и Кестутис Будрис, пренесува Танјуг.