Висок шведски дипломат е пронајден мртов откако беше уапсен под сомнение за шпионажа.

– Безбедносната служба SAPO го приведе мажот во недела и го држеше на испрашување до среда – соопшти шведското обвинителство, пишува Телеграф.рс.

Сепак, властите не потврдија дали починатиот дипломат е истото лице кое претходно било уапсено.

„Ја видовме информацијата објавена од Министерството за надворешни работи, дека еден од нивните вработени починал. Не можеме да потврдиме дека станува збор за лице кое претходно било уапсено и осомничено за шпионажа“, изјави портпаролот на SAPO, Јохан Викстром.

Неговиот адвокат, Антон Странд, му оддаде почит, но одби да ја коментира причината за смртта.

„Не можам да навлегувам во деталите од истрагата. Постои забрана за давање информации за спроведените истраги“, додаде тој.

Сепак, тој истакна дека дипломатот отишол во болница веднаш по неговото пуштање, а потоа поднел кривична пријава против полицијата за несоодветно однесување и напад.