Шведската Кралска академија на науки денеска самата ја проби прочуената тајност на добитниците на нобеловите награди – ги објави лауреатите за хемија четири часа пред официјалното претставување.

Националната телевизија „СВТ“ објави дека, најверојатно по грешка, во 7.30 часот го добила електронското писмо од Академијата со годинашните добитници на Нобеловата награда за хемија, повеќе од четири часа порано од официјалното претставување. Во пораката било истакнато дека наградата за хемија ја добиле тројца американски научници – Мунги Бавенди, Алексеј Екимов и Луис Брус поради откривањето и синтетизирањето квантни точки.

Академијата итно реагираше откако „СВТ“ ги објави имињата на лауреатите.

– Нема уште одлука. Сѐ што можам да кажам е дека не можеме да коментираме што се случило. Не е донесена одлука. Лауреатите ќе бидат објавени во 11.45 часот, како што е планирано – изјави Ева Невелиус, претставничка за медиуми на Академијата.