Кандидатката на СДСМ за градоначалничка на Град Скопје, Каја Шукова, на средба со жителите на населбата Автокоманда најави дека со три катни гаражи ќе го среди сообраќајниот хаос во населбата и вети изградба на Конгресен центар и нов Скопски саем во Гази Баба.

„Изградбата на модерен Конгресен центар ќе го постави Скопје на мапата на европски конгресни дестинации. Проектот претставува економски, туристички и културен ресурс со кој градот ќе може да биде домаќин на меѓународни конференции, научни и професионални собири и големи културни настани“, вели Шукова.

Паралелно со Конгресниот центар, Шукова најави и изградба на нов Скопски саем во Гази Баба. Новиот саем, според најавите, ќе има модуларни хали, конференциски сали, културни и комерцијални содржини, како и простор за мали и средни претпријатија и креативни сектори.

„Овој проект отвора нови пазари, ги поврзува локалните производители со странски партнери и создава услови младите да останат и да работат токму тука, во Скопје,“ додаде Шукова.

Таа најави и решение за долгогодишниот сообраќаен хаос во Автокоманда, каде што ќе се изградат три катни гаражи.

Како што вели Шукова, две од нив ќе бидат наменети за жителите, со сигурни и достапни паркинг места, а третата за вработените во околните компании, со цел да се ослободи јавниот простор и да се намали метежот.