Рускиот претседател Владимир Путин им соопшти на колегите од Франција и Германија, Емануел Макрон и Олаф Шолц дека планира да ја признае независноста на двата региони во Украина, Доњецк и Луганск.

Но, што всушност значи ваквото признавање, кое би можело дополнително да ја влоши актуелната состојба во Украина, за која САД вели дека Русија се подготвени да ја нападнат?

Путин им потврди на Макрон и Шолц: Русија ќе ги признае сепаратистичките региони во Украина

Кои се отцепените региони?

Руските сепаратисти во регионите Доњецк и Луганск – колективно познати како Донбас – се отцепија од контролата на украинската влада во 2014 година и се прогласија себеси за независни „народни републики“, до сега непризнаени.

Оттогаш, Украина вели дека околу 15.000 луѓе биле убиени во борбите. Русија негира дека е страна во конфликтот, но ги поддржа сепаратистите на многу начини, вклучително и преку тајна воена поддршка, финансиска помош, снабдување со ковид вакцини и издавање на најмалку 800.000 руски пасоши на жителите.

Москва секогаш негираше дека планира да ја нападне Украина.

Што значи руското признавање?

За првпат Русија вели дека не го смета Донбас како дел од Украина. Тоа би можело да го отвори патот за Москва отворено да испрати воени сили во сепаратистичките региони, користејќи го аргументот дека интервенира како сојузник за да ги заштити од Украина.

Пратеникот на рускиот парламент и поранешен политички лидер во Доњецк, Александар Бородај, минатиот месец изјави за Ројтерс дека сепаратистите потоа ќе се обратат кон Русија за да им помогне да ја преземат контролата врз делови од регионите Доњецк и Луганск, кои сè уште се под контрола на украинските сили. Ако тоа се случи, тоа може да доведе до отворен воен конфликт меѓу Русија и Украина.

Што со мировниот договор од Минск?

Руското признавање ефективно ги уништува мировните договори од Минск од 2014-2015 година, кои, иако сè уште не се спроведени, до сега ги гледаа сите страни, вклучително и Москва, како најдобра шанса за решение.

Договорите повикуваат на голем степен на автономија за двата региони во Украина.

Како ќе одговори Западот?

Западните власти со месеци ја предупредуваат Москва дека секое движење на воените сили преку украинската граница ќе принуди силен одговор, вклучително и строги финансиски санкции за Русија.

Американскиот државен секретар Ентони Блинкен минатата недела рече дека признавањето „дополнително ќе го поткопа суверенитетот и територијалниот интегритет на Украина, ќе претставува грубо кршење на меѓународното право и ќе ја доведе во прашање наведената посветеност на Русија да продолжи да се ангажира во дипломатијата за постигнување мирно решавање на оваа криза.

Тој рече дека тоа ќе бара „брз и цврст“ одговор од САД и нивните сојузници.

Дали Русија претходно признала вакви региони?

Одговорот е да. Русија ја призна независноста на Абхазија и Јужна Осетија, два грузиски отцепени региони, по водењето на кратката војна со Грузија во 2008 година.

ВИДЕО | Андоновиќ: За САД инвазијата на Русија е завршена работа-на Украина и се заканува грузијско сценарио

Кои се позитивните и негативните аспекти за Москва?

Во случајот со Грузија, Русија го искористи признавањето на отцепените региони за да го оправда отвореното воено присуство во соседна поранешна советска република, во обид на неодредено време да ги попречи аспирациите на Грузија за влез во НАТО со тоа што ѝ ја ускрати целосната контрола на сопствената територија. Истите размислувања ќе важат и за Украина.

Од друга страна, Москва се соочува со санкции и меѓународна осуда поради напуштањето на процесот во Минск, откако долго тврдеше дека е посветена на тоа. Исто така, ќе биде опседнато на неодредено време со одговорност за две територии опустошени од осумгодишна војна и на кои им е потребна огромна економска поддршка.

Извор: Ројтерс