По серијата земјотреси на грчкиот остров Санторини, морето долж турскиот егејски брег се повлече повеќе од 200 метри, јавуваат турските медиуми.

Морето почнало да се повлекува од 8 февруари, а денес во областа Чешме и пристаништето Алаџати било повлечено повеќе од 300 метри. Вообичаентото ниво на водата во областа Дикили и Бодрум е намалено за повеќе од половина метар, оставајќи зад себе многу заглавени чамци, пренесува „Политика“.

Иако жителите на регионот се вознемириле, поврзувајќи ја оваа појава со земјотресите во Санторини, експертите тврдат дека морската вода се повлекла поради силните северни ветрови и дека тоа е природен процес.

Д-р Мехмет Чавушоглу, член на Работната група за животна средина, биодиверзитет и климатски промени на Турската академија на науките (ТУБА) и проф. Д-р Доган Јашар изјави дека морската вода се повлекла поради силните северни ветрови кои достигнуваат удари и до 60-70 километри на час.

Јашар нагласува дека повлекувањето нема никаква врска со земјотресите во Егејското Море, велејќи дека нема причина за загриженост.
Забележано е и дека нивото на водата на реката Каршијака, која е живеалиште за многу птици, е намален.

Шефот на Катедрата за водни ресурси на Универзитетот во Мугла, д-р Џејхун Озчелик, рече дека морето во последните денови се повлекува по бреговите на Медитеранот и Егејското Море. Озчелик изјави дека земјотресите не се причина за оваа појава и дека нема потреба од паника кај граѓаните.

На брегот кај Мармарис поради повлекувањето на морето се формираа неколку нови острови, а морето се повлече и на плажите Узуњали и Ичмелер.

Морето се повлече и на околу 100 метри од брегот во Силиври кај Истанбул, во регионот Баликесир и во Дидим.

Беше забележано дека, како што водата се повлекуваше, на плажата се формираа острови од песок. Оваа појава, според експертите кои посочија дека причина за повлекувањето на морската вода на Дарданелите и на брегот на Анадолија е силен северен ветер, треба да трае до среда.