Што промени влезот на Бугарија во Шенген за Грција? На граничните премини, вклучително и Промахонас – Кулата, протокот на возила сега е речиси непречен. Дури и товарните камиони, кои претходно мораа да чекаат со часови на контролните пунктови, сега само забавуваат кога ја минуваат границата. Поранешните проблеми со задржувањето, кои траеја и до 20 часа, сега се минато. Во исто време, лесниот пристап до бугарските градови, како што е Сандански, дополнително го зголеми бројот на грчки посетители кои одат таму на шопинг, одмор и гориво, што е значително поевтино отколку во Грција.

Овој град, со околу 30.000 жители, сега е полн со грчки туристи и купувачи, кои купуваат облека, обувки, покуќнина и храна во тамошните продавници. Иако граѓаните се задоволни од побрзото преминување на границата, загриженост изразуваат голем број грчки трговци и претприемачи во пограничните области. Поевтините стоки и пониските цени на горивата во Бугарија се повеќе ги тераат потрошувачите преку граница, што дополнително ги загрозува локалните грчки бизнисмени, кои претрпеа загуби поради големата конкуренција од бугарска страна, анализира Каматица. Наскоро ќе бидат познати првите податоци за бројот на возила што ја поминале границата во јануари 2025 година, но веќе се зборува за значителен пад на сообраќајот на локалните грчки бензински пумпи и продавниците на мало.

Покрај малопродажбата, со сериозни предизвици се соочува уште еден сектор – зимскиот туризам. Популарните бугарски скијачки центри, како Банско, сега се уште попривлечни за грчките туристи. Благодарение на укинувањето на граничните контроли, патувањето од Солун до Банско трае само 2,5 часа, додека цените на сместувањето, храната и скијачката опрема се значително поевтини отколку во Грција. Друг предизвик што го носи новонастанатата состојба е зголемениот ризик од шверц на стоки, особено гориво и земјоделски производи. Поради ова, грчките власти веќе го зголемија надзорот на увозот и извозот за да спречат нелегални активности. Исто така, се поставува прашањето дали подобрените услови во Бугарија ќе продолжат да ги охрабруваат грчките компании да го преселат своето работење таму. Веќе се проценува дека во Бугарија работат околу 18.500 грчки компании, со годишен обрт од 3,9 милијарди евра.