За што сè наплаќаат малопродажните синџири за да ја стават стоката на нивните полици?
Откако Здружението за заштита на потрошувачите „Ефектива“ ги повика граѓаните да ги бојкотираат големите трговски ланци во петок, на 31 јануари, поради цените кои се меѓу највисоките во Европа, дел од супермаркетите кои се најдоа на „листата за бојкот“ се обидуваат да ја префрлат вината на производителите и добавувачите. Имено, движењето „Еко гарда“ на својата страница на Инстаграм објави мејл наводно испратен од трговскиот синџир Универекспорт до своите добавувачи, во кој им се вели дека нема да прифатат промени на ценовникот почнувајќи од 1 јануари до крајот на првиот квартал. Дури и предлагаат да се одложи пријавеното поскапување за периодот по 1 јануари и да се вратат цените на нивоата пред поскапувањето, пишува Данас.
Препорачано
„Давачките на трговските синџири се движат од 25 до 40 проценти, зависи од сумата на пари“. Вработен во мала компанија, добавувач на увозна стока, кој сакаше анонимно да зборува, вели дека маржите на добавувачите се по 10 отсто, а на малопродажните синџири не се под 30 отсто.
Тој додава дека нивната компанија има најголеми долгови кон трговските синџири и посочува дека тие „го јадат сиот профит“.
„На пример, ако нашиот годишен нето промет е 10 милиони динари, им даваме до четири милиони динари. Процентуално, тоа е 25 до 40 отсто од нашиот приход. Зависи од синџир до синџир, некои се поевтини, некои поскапи“, истакнува нашиот соговорник. Врз основа на договорот на оваа компанија добавувач, може да се заклучи дека трговските синџири „им наплаќаат за воздух“.
Малопродажните синџири на овој добавувач му наплаќаат до 10.000 евра годишно за паушален надоместок за маркетинг буџетот, потоа паушална такса за публикации во каталози и летоци што е пет и повеќе проценти или фиксна такса од повеќе од 500 евра месечно. Тие наплаќаат и надомест за одржување на асортиманот, позиционирање и креирање на планограм (план за уредување на полиците) од 10 проценти или повеќе секој месец, како и надоместок за користење на порталот од еден процент или повеќе месечно. Потоа следува надоместок за примарно позиционирање од исто така еден и повеќе проценти месечно, а ист е и надоместокот за секундарно позиционирање на месечно ниво. Малопродажните синџири наплаќаат и логистичка такса од пет проценти или повеќе месечно.
