Павилјоните на белградскиот Експо 2027 ќе бидат урнати – а не се знае кој и што ќе гради таму. Исто така, се чини дека српската Влада има намера тие павилјони да ги стави на „пробна“ работа, без употребна дозвола. Трошоците за изградба на павилјонот на проектот „Експо 2027“ сè уште не се познати. Не се знае многу за организацијата на самата изложба, бидејќи сè уште е „во процес“, пишува Нова економија.

Во тек е и пријавувањето на учесниците за изложбата. Секоја од земјите учеснички ќе има по еден павилјон во Белград, а тие павилјони потоа ќе бидат урнати. Според белградската компанија „Експо 2027“, на изложбата се очекува да присуствуваат околу 120 земји, меѓународни организации и компании. Сепак, во еден од документите стои дека павилјоните ќе бидат урнати откако ќе се искористат за потребите на изложбата.

На нивно место ќе се градат објекти „кои ќе бидат од траен карактер и за кои ќе треба да се добие решение за употребна дозвола согласно законот со кој се уредува планирањето и градењето“. Урбанистката Божена Стојиќ за „Време“ вели дека не се знае што би можело да се изгради на местото на павилјоните, откако ќе се урнат.

„Лекс специјалис за Експо предвидува државата да може да основа компанија, која не мора да биде целосно во нејзина сопственост. Таа компанија по реализацијата на изложбата би стопанисувала со земјиштето и со целиот комплекс. На кој начин, не е дефинирано. Таа можност е само отворена“, вели Стојиќ.