Продолжување на изградбата на конзолите на река Отиња, за да се реши сообраќајниот хаос во центарот на градот, доизградба во фази на булеварот „Партизанска” од АМД до населбата Баби, три катни гаражи во центарот, санација на старатa водоводна мрежа во неколку фази, реконструција на десеттина улици.

Ова се дел од капиталните проекти, предвидени за финансирање и реализација во буџетот на Општина Штип во 2023 година, а кој во моментов се крои. Градоначалникот на Општина Штип, Иван Јорданов вели дека се очекува буџетот за наредната година да изнесува околу 450 милиони денари.

-Преку отворени денови и средби со урбаните и месните заедници општината го креира општинскиот буџети за 2023 година. Промена на водоводната и канализационата мрежа во градот, воспоставување јавен градски превоз, решавање на сообраќајниот метеж, паркинг места и реконструкција на улици се најчестите проблеми кои штипјани ги презентираа, вели Јорданов.

Завршени се средбите со претставниците на урбаните заедници, како и Отворените денови за време на викендите. Јорданов информира дека остануваат средбите со граѓаните секоја среда во 18 часот.