Штефанитаг, денот по Божик што Австријците му го посветиле на Свети Стефан, има длабока симболика во општество – потсетува на важноста на солидарноста, великодушноста и благодарноста.

Овој ден е длабоко вкоренет во христијанската традиција и културното наследство на Австрија. Свети Стефан, првиот христијански маченик и заштитник на сиромашните, бил еден од првите ѓакони во христијанската црква. Познат по својата великодушност, неговото наследство се прославува како симбол на хуманост и несебично служење на ближните.

Овој празник се прославува како државен и претставува продолжение на духот на Божик. Во Австрија, Штефанитаг е ден за семејни дружења, посети кај пријатели и продолжение на празничните гозби. Во многу региони овој ден се одбележува со традиционални благослови на добитокот, како и свечености што го изразуваат почитувањето кон природата и земјоделскиот начин на живот.

Коњички паради

Празникoт датира уште од средниот век и првично бил ден за благодарност за плодната година и благосостојбата, како и за благослов на добитокот, кој играл клучна улога во земјоделскиот живот. Овој обичај и денес се почитува во руралните предели на Австрија, каде што свештениците ги посетуваат фармите и ги благословуваат животните. Во некои региони, како Долна Австрија и Корушка, се организираат паради на јавачи, каде свечено украсени коњи се движат низ селата во чест на Свети Стефан.

Во денешниот свет, кога многумина бараат духовна поврзаност и смирение, овој празник нуди можност за размислување за вредностите што го надминуваат материјалното. Штефанитаг е жива врска меѓу историјата, духовноста и модерниот начин на живот, правејќи го неизоставен дел од австриското културно наследство.

Во градовите, овој ден е обележан со продолжување на празничните активности, посетување саеми и културни настани. Концертите во катедралата Свети Стефан во Виена се меѓу најзначајните настани што го надополнуваат празникот со духовна и културна димензија.

Божиќна трпеза во ново руво

На празничната трпеза за Штефанитаг често се користат остатоците од Божиќната вечера за подготовка на нови јадења. Типични специјалитети вклучуваат штефанска печеница, јадењe коe се подготвува од преостанатото печено месо, сервирано со сос од брусница и компир-салата.

Домаќинкитe често прават паштети и ролати од месо и зеленчук, а топлите супи со разни видови кнедли се неизоставен дел од трпезата. Покрај главните јадења, како прилог се служат ароматични салати од компир и зелка. Празничните десерти, како штрудли и колачи, се центарот на вниманието, дополнети со кафе или топло чоколадо.