Шпанското Министерство за заштита на потрошувачите му наложи на Aрбиенби да отстрани речиси 66.000 огласи за изнајмување недвижности од својата платформа, за кои тврди дека ги кршат постоечките правила, бидејќи или немаат лиценца или не е познато дали сопственикот е поединец или компанија.

Повеќето од засегнатите имоти се во Мадрид, Андалузија и Каталонија, а министерот за права на потрошувачите Пабло Бустиндуј рече дека има за цел да го прекине општиот недостаток на контрола и нелегалноста во бизнисот со изнајмување, пишува Јутарњи лист.

-Нема повеќе изговори. Доволна заштита за оние кои прават бизнис од правото на домување во нашата земја – изјави тој пред новинарите, откривајќи дека Високиот суд во Мадрид го поддржал барањето за повлекување на дури 5.800 огласи.

Портпаролот на Aрбиенби изјави дека ќе поднесе жалба на одлуката, бидејќи верува дека Министерството нема овластување да донесува одлуки за краткорочни изнајмувања и не успеало да обезбеди список базиран на докази на сместувачки капацитети што не се во согласност со прописите.

Тие исто така тврдат дека Министерството применило неселективна методологија што вклучувала реклами за кои законски дури и не е потребна лиценца за работа.

Шпанија моментално се соочува со сериозна криза со достапноста на домување. Во последните месеци, десетици илјади граѓани излегоа на улиците во знак на протест против зголемувањето на цените на недвижностите и трошоците за изнајмување.

Многумина тврдат дека брзата експанзија на краткорочното сместување преку платформите го влошила проблемот, особено во градовите со голема побарувачка како Мадрид, Барселона и други популарни туристички дестинации.