Шпанскиот амбасадор во Србија, Раул Бартоломеу Молина потврди дека Шпанија нема намера да го смени мислењето околу признавањето на независно Косово.

Молина вели дека тоа е официјален политички став на Шпанија и не станува збор за мислење на некоја политичка партија што тоа мислење би го променило доколку дојде на власт.
Во изјава за белградски „Курир“ изјави дека таквиот став не се менува дури и доколку Мадрид отвори канцеларии во Приштина.

„Едностраната независност што територијата ја прогласи во 2008 година наруши еден од основните принципи на меѓународното право – принципот на територијалниот интегритет. Во таа смисла, бидејќи позицијата на Шпанија се заснова на објективни и правни причини и е широко поддржана во земјата, е многу цврста. Било какви гласини во спротивна смисла, не се ништо друго освен чиста шпекулација“, додаде амбасадорот Молина.