Дизајнерите на Шкода повторно беа инспирирани од богатата историја на брендот и создадоа современа интерпретација на легендарниот пикап модел „Felicia Fun“.
Во согласност со актуелниот дизајнерски јазик „Modern Solid“, францускиот дизајнер Жулиен Петисенјер замисли како би можело да изгледа ова иконско возило денес.

Оригиналната „Skoda Felicia Fun“ се произведуваше од 1997 до 2000 година во фабриката во Квасини. Уникатен елемент на овој модел беше лизгачката задна преграда што овозможуваше поставување на две дополнителни седишта на отворено. Иако беше достапна во три комбинации на бои, жолтата каросерија беше суштински дел од нејзиниот идентитет. Со само 4.216 произведени единици, таа останува еден од најретките модели на Skoda- пишува Каматица.

Жулиен Петисенјер ја прилагоди својата визија на современите стандарди, задржувајќи ја „кул атмосферата на плажа“ од деведесеттите години. Предниот дел од автомобилот е инспириран од електричните возила и концептот „Vision 7S“. Карактеристичната маска „Tech-Deck Face“ и тенките LED фарови во облик на Т му даваат на возилото модерен изглед.

Деталите како розовите задни светла во стилот на деведесеттите со LED лента и розовите акценти на логото и тркалата, додаваат разигран допир. Пропорциите се исто така темелно модерни: широк став, големи тркала и контрастни црни браници, прагови и лакови на тркалата.

Внатрешноста ги меша ретро и модерното, со дисплеј на контролната табла што потсетува на стари CRT монитори со графика од видео игри.

Во овој проект, Жулиен експериментираше и со вештачка интелигенција со цел брзо да генерира почетни концепти, а потоа рачно да ги усоврши.

„Иако вештачката интелигенција помогна, сепак поминав многу часови усовршувајќи ги деталите“, истакнува Петсињор.

Овој проект покажува дека е можно да се комбинира наследството на брендот со новите трендови и да се создаде визија што оддава почит на минатото, а воедно гледа кон иднината.