Шампионот на Македонија, Шкендија, oдигра реми без голови во првиот натпревар на гостински терен кај ТНС во Велс во рамките од квалификациите во Лигата на шампионите.

Во натпревар со малку шанси и многу тактичко надмудрување, домашниот тим покажа нешто повеќе, особено во првото полувреме кога имаше иницијатива и создаде неколку опасни ситуации пред голот на тетовци.

На висина на задачата беше голманот на Шкендија, Гаје, кој со неколку клучни интервенции го сочува својот гол и се наметна како еден од најдобрите поединци на теренот.

Но, и македонскиот првак не беше без шанси, Адеми, Љатифи, Цека… се закануваа меѓутоа и противничкиот чувар на мрежата не дозволи да биде совладан.

Реваншот се игра за седум дена на Националната арена „Тодор Проески“ во Скопје.