Кинескиот трговец на мало „Шеин“ поднесе барање за котирање на берзата во Хонг Конг. Минатата недела, компанијата поднесе доверлив нацрт-проспект до берзата во Хонг Конг и побара одобрение од Комисијата за регулирање на хартии од вредност на Кина, објави „Фајненшл тајмс“, повикувајќи се на извори.

Правилата на берзата во Хонг Конг дозволуваат доверливи проспекти само за компании кои веќе се котирани на друга берза, како што е берзата во Њујорк. Доверливите проспекти се вообичаени во Соединетите Американски Држави, но се невообичаени во Хонг Конг. Кинескиот регулатор мора да одобри секоја првична јавна понуда, а весникот објави дека компанијата веќе добила зелено светло.

„Шеин“, кој го задржува поголемиот дел од својот синџир на снабдување во Кина, поднесе барање за првична јавна понуда во Лондон пред околу 18 месеци, но не успеа да добие регулаторно одобрение.

Британските и кинеските регулатори се во конфликт околу соодветниот јазик што треба да се користи во делот за откривање на ризик од проспектот. Разликите се фокусираа особено на изложеноста на Шеин во синџирот на снабдување во политички чувствителниот регион Синџијанг, каде што Кина е обвинета за кршење на човековите права против локалното ујгурско население.

Управата за финансиско однесување на Велика Британија одобри верзија на проспектот на трговецот претходно оваа година, но таа не беше прифатена од кинескиот регулатор. Во последниве години, телото со седиште во Пекинг стана построго во врска со тоа како компаниите ги опишуваат ризиците од водење бизнис во Кина, велат извори, јавува БТА.