Помошникот државен секретар за европски и азиски прашања Карен Донфрид, која е во повеќедневна посета на Западен Балкан, денеска во Белград ќе се сретне со српскиот претседател Александар Вучиќ, соопшти Стејт департментот. Според соопштението, таа ќе ја повика Србија да ги засили реформите насочени кон европската интеграција и да ја промовира регионалната стабилност и просперитет.

Донфрид, како што се наведува, ќе ја повтори потребата Србија и Косово повторно да се вклучат во дијалогот што го води Европската унија, што е пораката што ја испрати и за време на нејзините вчерашни средби со косовските официјални претставници во Приштина.

Американскиот претставник во Белград според најавите ќе разговара за можностите за енергетска диверзификација и билатералните безбедносни и економски врски. Во Белград таа ќе ја повтори потребата Србија и Косово повторно да се приклучат на дијалогот предводен од ЕУ.

Во Босна и Херцеговина на 27 април, Донфрид ќе ги охрабри официјалните лица да продолжат да ги вклучуваат институциите на сите нивоа на власта и да ја повика БиХ да постигне напредок во борбата против ендемската корупција.

На 28 април, со претставниците на Македонија, според Стејт департментот Донфрид ќе изрази силна поддршка за преговорите на земјата за пристапување во ЕУ и ќе ѝ се заблагодари на на помошта за Украина.

Американскиот дипломат ќе ја повика Македонија да продолжи блиската соработка за голем број регионални, безбедносни и одбранбени прашања со цел промовирање на демократијата и регионалната стабилност.

За време на посетата на Албанија на 28 април, Донфрид ќе одбележи 100 години од американско-албанските дипломатски односи и ќе и се заблагодари на Албанија за нејзината посветеност на суверенитетот и територијалниот интегритет на Украина.

Донфрид на 29 април ќе отпатува за Црна Гора каде ќе ја нагласи поддршката од САД и потребата да се забрза работата на евроатлантскиот пат на Црна Гора и пристапувањето во ЕУ. Американскиот помошник државен секретар за европски и евроазиски прашања ќе и се заблагодари на Црна Гора што се приклучи кон санкциите против Русија како поддршка за Украина.