Министерката за надворешни работи на Германија во заминување, Аналена Баербок, ќе биде новиот претседател на Генералното собрание на Обединетите нации. Некои го критикуваа нејзиното заминување во Њујорк, но таа со нетрпение го очекува, објави дпа.

А нејзините ќерки, како што изјавила за магазинот „Бунте“, се воодушевени. Пред се, на децата ќе им олесни што во Америка повеќе нема да ги гледаат како ќерки на позната мајка, објаснила политичарката од Зелените.

„Таму нема да имаат чувство дека постојано ги гледаат“, рече Баербок.

Министерката во јуни треба да биде избрана во техничкиот мандат во ОН, а едногодишниот мандат треба да го започне во септември. Назначувањето, според внатрешните договори во рамките на ОН, се смета за формалност.

Првично, највисоката германска дипломатка Хелга Шмид беше предвидена за оваа позиција, а новата одлука предизвика критики.

Поранешниот претседавач на Минхенската безбедносна конференција, Кристоф Хојсген, на пример, ја нарече кандидатурата на Баербок „дрскост“.

„Најдобриот и меѓународно најискусниот германски дипломат е заменет со модел со истечен рок“, рече Хојсген.

Во 2021 година Баербок ги предводеше Зелените како прва кандидатка за канцеларка на изборите. Во ноември истата година, таа и нејзиниот сопруг Даниел Холефлејш се разведоа. Политичарката има две малолетни ќерки.