Претседателката Гордана Сиљановска-Давкова, под чија надлежност е Агенцијата за разузнавање, за тоа дека „Цилиндар“ и „Џокер“ го следеле премиерот, слушнала од медиуми, од весници, а од директорката на Агенцијата, Габриела Јаковлева, не ни била информирана дека присуствувала на владина седница, на која премиерот побарал да се направи внатрешна контрола во разузнавачката агенција што резултираше со кривична пријава во која се бара кривична одговорност за директорката.

По поднесувањето на пријавата во Обвинителството, „Слободен печат“ испрати прашања и до претседателката, и до Агенцијата за разузнавање и до Владата, но краток одговор добивме само од Владата. Од Кабинетот на претседателката и по речиси една седмица не одговорија дали премиерот се меша во надлежностите на претседателот на државата и дали ќе преземе нешто по повод наводите во кривичната пријава.

Молк од Кабинетот на Сиљановска-Давкова

– Не сум присуствувала на таа седница. Не ме известила директорката дека ќе оди на седница на Владата. Кај мене доаѓаат, јас ги посетив. За случајот за следење на премиерот сум чула, како вие, вака, од весници – рече Сиљановска-Давкова во телевизиско интервју на прашањето со кое овластување премиерот повикал на седница на Владата членови на Агенцијата за разузнавање, бидејќи „имал индиции дека бил следен“.

ДКСК ја запре постапката за заменик директорката на АР – имало вкупно 8 пријави и една во Обвинителство

Тоа е последниот нејзин коментар на оваа тема. Од Кабинетот на претседателката веќе не одговорија на прашања поврзани со ова.

Првата посета во Агенцијата за разузнавање Сиљановска-Давкова ја имаше уште во февруари и според протоколарното соопштение, на претседателката ѝ бил претставен Годишниот извештај за работата за 2024, како и тековните и среднорочните регионални и национални безбедносни закани, ризици и предизвици.

– Претседателката Сиљановска-Давкова, во разговор со раководството на Агенцијата, се запозна со оперативните, аналитичките, техничките и кадровските капацитети и можностите за нивно понатамошно унапредување – пишуваше во соопштението.

Ниту од Агенцијата официјално не ја коментираа кривичната пријава против директорката на АР, а воздржан за ова прашање беше и премиерот Христијан Мицкоски.

– Тоа прашање најдобро да го поставите на Обвинителството – изјави Мицкоски на прашање за ова.

И од Владата се воздржаа од одговор на нашето прашање и топката ја префрлија на Јавното обвинителство. За сите многубројни прашања до нив, поврзани со Јаковлева, велат дека тоа е во надлежност на Обвинителството, иако во пријавата беа детално прецизирани членовите од Законот за разузнавање, според кои произлегува дека е незаконско давањето класифицирани извештаи на Владата, потоа наредбата на премиерот Христијан Мицкоски да се спроведе внатрешна истрага во АР, како и објавувањето псевдоними, како „Цилиндар“ и „Џокер“.

Од Обвинителството само информираат дека пред пријавата стигнала на почетокот на јуни во Обвинителството за гонење организиран криминал и корупција и таа е препратена во скопското јавно обвинителство кое работи на предметот. Од Обвинителството за гонење на организиран криминал нема информации до каде е предметот, што републичкиот јавен обвинител го отвори по наводите на премиерот дека бил следен.

Кривична од студенти од Факултетот за безбедност

Кривичната што стигна до нашата редакција е со потпис „студенти од Факултетот за безбедност Скопје“. На повеќе од десет страници се нотирани кривичните дела за кои има сомнеж дека ги направила директорката откако Мицкоски од собраниска говорница читаше делови од класифициран извештај од Агенцијата, споменувајќи псевдоними „Цилиндер“ и „Џокер“, кои наводно тајно го следеле.

Во неа, детално се прецизирани членовите од Законот за разузнавање, според кои произлегува дека е незаконско давањето класифицирани извештаи на Владата, потоа наредбата на Мицкоски да се спроведе внатрешна истрага во АР, како и објавувањето псевдоними.

Аргументите се дека АР е институција во надлежност на претседателот, односно според Законот за АР, Агенцијата е посебен орган на државната управа, со која раководи директор што го именува и го разрешува претседателот, директорот му одговара на претседателот и е самостоен во извршувањето на работите во Агенцијата.

ДКСК го затвори за јавност предметот за заменичката на АР – претседателката во одбрана на директорките

Во Законот за АР, Владата се споменува само петпати, и тоа во контекст што не се однесува на барање одговорност, давање задачи или испитување на работата на АР.

– Во ниту еден член од Законот за агенцијата за разузнавање не е предвидено дека Владата може да бара внатрешна истрага или внатрешна контрола во Агенцијата. Според член 7 став 5 од Законот за АР, единствено директорот донесува наредба за вршење внатрешна контрола. Владата не смее да дава задачи за спроведување „истрага“, бидејќи единствен надлежен орган е Судот и Јавното обвинителство – се додава во дел од пријавата.

Всушност, единствено надлежна за контрола над работата на АР и на АНБ е собраниска комисија, односно Собранието. Владата нема право да бара информации и податоци што се однесуваат на соработници, оперативни активности и идентитет на вработени и со објавување на псевдонимите, загрозен е идентитетот на изворите и на оперативните соработници на Агенцијата.