Шалтерски работник во Одделението за материјално финансиско работење во прилепската болница проневерил речиси 2 милиони денари. Наместо да ги предаде на благајникот на болницата, тој си ги присвоил парите што ги наплатувал од пациентите.

Осомничениот тоа го правел во периодот од 01.08.2024 до 30.04.2025 година.

Основното јавно обвинителство Прилеп спроведе истрага против шалтерскиот работник за проневера во службата.

„Иако бил должен паричните средства кои ги наплатувал од пациентите на Отсекот за медицина на трудот по основ на партиципација и приватни здравствени услуги да ги предаде на крајот на работниот ден на благајникот на болницата со приложени дневен фискален извештај, потврда од извршена наплата преку пос терминали и каса прими, осомничениот примопредавањето во благајната го вршел со контролни фискални извештаи испечатени кон средина на работното време и не ги прикажувал реално наплатените средства за тековниот ден, а вршел и сторнирање на наплатени парични средства, иако не поседувал потпис и печат од доктор по медицина на трудот. На тој начин за себе прибавил поголема имотна корист во вкупен износ од 1.991.240 денари“ соопшти обвинителството.

Јавниот обвинител до судијата на претходна постапка од Основниот суд во Прилеп достави предлог за определување мерка притвор за осомничениот, оценувајќи дека се исполнети законските основи.