Паркот Хајаркон во центарот на Тел Авив на пролет обично е преполн со луѓе кои тренираат, меѓутоа, ова година, наместо со луѓе, поради коронавирусот, тој е полн со шакали.

Бројни животни од овој вид стигнаа од непозната локација и буквално станаа „господари“ во еден од најубавите паркови во Израел, во кој, во нормални околности си играат деца, а младите си организираат пикник.

Иако граѓаните најпрво помислија дека шакалите пристигнале во градот барајќи малку забава, сепак ветеринарите велат дека гладот ги натерал на тоа.

– Во оваа ситуација шакалите се принудени да влезат во самиот центар на градот за да се прехранат – вели ветеринарот Зви Галин.

Шакалите се толку гладни што дури им дозволиле на некои луѓе да им се доближат и да им остават садови со храна.

Ова не е прв случај на доаѓање на диви животни во градови во Израел. Неодамна во еден град се воочени диви свињи како шетаат по улица.