Од први јуни, Меѓународниот аеродром Скопје се поврза со уште три градови во Tурција. Авиокомпанијата „АJet“ изминатиов викенд почна да лета до Анкара, Чукурова, Дијарбакир, три нови дестинации за одмор, соопшти аеродромскиот оператор ТАВ Македонија.

Сезонските летови од Скопје до Анкара и до Дијарбакир ќе се одвиваат еднаш неделно, а до аеродромот Чукурова два пати недела, а до сите три дестинации ќе се лета од први јуни до крајот на септември годинава.

„Спојот на Скопје и Анкара ќе придонесе за зголемена трговска размена, брза бизнис логистика меѓу Македонија и Турција, лесен пристап до турскиот пазар, бизнис-мобилност, туристичка и културна размена, образовна и академска соработка, поврзување на заедниците, а ќе придонесе и за дополнително унапредување на политичките и дипломатските односи”, изјави Неџат Курт, генерален директор на ТАВ Македонија.

Со новите три дестинации, авиокомпанијата „АJet“ од Меѓународниот аеродром Скопје ќе има вкупно 4 дестинации, вклучувајќи ја и веќе постоечката линија до Истанбул, до аеродромот Сабиха Гокчен. Во тековната летната сезона 2025, вкупно четири авиокомпании летаат меѓу Турција и Македонија, до вкупно 6 града и 7 аеродроми во Турција. Од Меѓународниот аеродром Скопје и од Аеродромот Свети Апостол Павле во Охрид, „Turkish Airlines“ лета до Истанбул (IGA аеродром); „Pegasus Airlines“ лета од скопскиот аеродром до Истанбул (аеродром Сабиха Гокчен), Измир и Анталија, „АJet“ исто така лета од Скопје до Истанбул (аеродром Сабиха Гокчен), а „Sun Express“ лета од Скопје до Анталија и Измир.