Дезертер од Северна Кореја пребегнал во Јужна Кореја откако отпливал по брегот и ги избегнал вооружените граничари, на кои им е наредено да пукаат во секој што се обидува да избега од режимот на Ким Џонг Ун.

Неидентификуваниот маж бил пронајден доцна навечер на 30 јули, според јужнокорејските власти, кои го објавија неговото бегство денес, четврток.

Севернокореецот пливал по западниот брег на Корејскиот Полуостров, врзувајќи околу себе – како импровизиран елек за спасување – пенаста пластика.

Западниот брег на Корејскиот Полуостров се граничи со Жолтото Кинеско Море (исто така познато како Западно Море во Кореја) и Корејскиот Залив.

Крајбрежјето е нерамно, со вдлабнатини и многу острови, особено по должината на југот и западот.

На почетокот на јули, севернокорејска дезертерка во Јужна Кореја го тужеше севернокорејскиот лидер Ким Џонг Ун и уште четворица други функционери во Пјонгјанг за злоупотреба што ја претрпела додека била притворена во земјата.

Во истиот период, Сеул депортираше 6 Севернокорејци кои имаа „силна желба“ да се вратат во својата земја .