Британската манекенка Лоти Мос (26), полусестра на модната икона Кејт Мос (50), завршила во болница поради прекумерна употреба на лекот за дијабетес Оземпик, кој многумина неправилно го користат за намалување на телесната тежина.

Таа признала дека го користела лекот две недели, поради што ѝ се слошило и рече дека „попрво би умрела“ отколку повторно да го користи, пишува „Дејли мејл“.

Манекенката проговори за своето искуство во поткастот „Dream On“, за да ги предупреди сите што сакаат да го користат лекот.

Се присети на моментот кога отишла во болница затоа што ѝ се слошило, а во болница добила напад предизвикан од тешка дехидрација. Мос рече дека лицето и рацете почнале да ѝ се грчат и дека тоа е едно од најстрашните искуства во нејзиниот живот. Откако била прегледана во болница, дознала дека дозата што ја користела била наменета за луѓе со тежина поголема од 100 килограми, додека таа имала околу 60.

„Не бев среќна со својата тежна пред неколку месеци. Имам пријателка, која ми го набави за мене. Таа го доби преку лекар, но беше задолжително да направам преглед, кој е неопходен за сите оние кои мора да примаат Оземпик. На крајот од денот, тоа е лек – опасен е и наменет е за губење килограми кај луѓе кои се болни. Кога јас го земав, дозата која ја земав беше наменета за луѓе кои имаат 100 килограми и повеќе, а јас иамв околу 60. Тоа се некои мали работи за кои ќе беше добро да ги знаев пред да почнев да го користам. Но, го земав и тоа беше најлошата одлука што сум ја направила во животот. Ова е предупредување за сите. Ве молам, ако размислувате да го земете – немојте, не вреди“, раскажа таа.

Манекенката, која е позната и на сајтовите за возрасни, ги опишала и несаканите ефекти кои ги имала по консумирањето на лекот. Рекла дека имало повраќање, губење на бојата на кожата и драстично слабеење. Таа рече дека по првата доза отишла од 60 килограми на 57, а потоа на 53

„Попрво ќе умрам отколку да го користам повторно. Толку многу ми се слоши. Го земав две недели. Пакувањето доаѓа со пенкало и дози, кои се земаат еднаш недело. Јас никогаш во животот не сум се чувствувала толку лошо. Повраќав и беше ужасно. Првиот пат земав мала доза, а потоа ја зголемив. Потоа лежев во кревет два дена, се чувствував болно и мојата тежина одеше надолу. Тоа не е здраво слабеење“, рече таа.

Кога сфатила дека не може да стане од кревет, решила да прекине со Оземпик, но тоа не било така едноставно бидејќи тој останува во нејзиното тело.

„Се чувствував толку лошо еден ден и ѝ реков на пријателката дека не можам да задржам вода во себе, не можам да задржам храна, течност, ништо. Морав да одам во болница“, рече таа.

На пат кон болница добила напад, а медицинската сестра била шокирана кога дознала каква доза зема.

„Отидовме во просториите на Итната медицинска помош во три часот наутро, ме прегледа една медицинска сестра и ме праша колкава доза Оземпик сум зела. Откако ѝ кажав, таа ми рече: ‘О, Боже. Не смееш да земаш толкава доза’. Таа ме праша колку килограми сум изгубила за две недели, па ме прати во соба за итни случаи и ме возеа со инвалидска количка низ болницата. Во еден момент отидов во тоалеотот и ми беше многу лошо, мислев дека ќе се онесвестам. Мислев дека нешто ми се случува, не се чувствував добро. Штом стигнав во собата, ме прегледа уште една медицинска сестра и буквално имав напад поради дехидрација. Тоа беше најстрашното искуство во мојот живот“, раскажа манекенката.

Мос рече дека се надева дека нејзиното искуство ќе биде лекција за другите луѓе.

„Тоа е за дијабетес, тоа не е навистина за губење на тежината. Знам дека сите познати личности го користат и тешко е да се гледа на тоа драматично губење на тежината, особено за луѓето со нарушувања во исхраната“, рече Мос, додавајќи дека лековите за слабеење треба да престанат да бидат тренд.