Семејството на 21-годишната Ивона Антова од Кочани, една од жртвите во трагичниот пожар во дискотеката „Пулс“, јавно проговори за последните моменти на нивната ќерка, не како сведоштво на мирен крај, туку како обвинение за сурова и нечовечка негрижа. Во потресен апел објавен на социјалните мрежи, родителите тврдат дека Ивона не починала веднаш од повредите, туку била оставена сама, препуштена на болка, без медицинска помош и во нечовечки болнички услови.

„Ивона не беше само жртва на пожарот, таа беше оставена сама, претепана, без помош. Снимила сè, како ја буткаат, како паѓа, како моли за рака, а никој не ѝ помогнал“, пишуваат родителите во сведоштвото што предизвика бран емоции во јавноста.

Според нивните зборови, младата девојка со последните сили го вклучила својот мобилен телефон и документирала дел од пеколот во кој се нашла. Наместо хуманост, околу неа, молк, удари и игнорирање. Наместо спас, паника и брутална рамнодушност.

„Татко ѝ ја најде легната на страна, со рачето под главата, како да се обидела да стане, а не можела. Јас, нејзината мајка, не можев ни да ја вида, бев приклучена на инфузија, а срцето ми умираше со неа“, продолжува сведочењето.

Но трагедијата не завршила во дискотеката. Според родителите, Ивона била оставена без кислородна поддршка, без лекарска грижа и без основна човечка почит во интерното одделение во кочанската болница.

„Беше сама, со опожарени гради и лице, без воздух, без никој што ќе ја држи за рака“, обвинува семејството.

Јавниот апел завршува со гнев, болка и решеност: да не дозволат трагедијата да се заборави, да се побара одговорност од сите што затаиле, од дискотеката, од службите, од здравствениот систем.

„Љубовта кон Ивона нема никогаш да згасне. Ќе се бориме за неа, како што таа се бореше“, порачуваат Антови.