Компаниите што произведуваат кондиторски производи и алкохолни пијалаци веќе чувствуваат значителни загуби, а тоа продолжува и понатаму и покрај отворањето на угостителските капацитети. Уште со почетните владини мерки против ширењето на корона-вирусот, кога рестораните смееја да извршуваат достава на храна, работите тргнаа надолу, а со правилото за задолжително растојание меѓу гостите, капацитети драстично се намалени, а прометот преполовен.  И статистички веќе е забележано намалување на прометот со храна, пијалаци и тутун и тоа номинално за 13,8 проценти, а реално за 15,6 проценти.

– Во прехранбената индустрија најголем удар трпат производителите на кондиторски производи и на алкохолни пијалаци. Поради преполовениот промет, ваквата ситуација продолжува и сега, иако е отворен каналот на хотели, барови и ресторани. Поврзано со ковид-19, удар трпат производителите на сирење и кашкавал, особено помалите кои се ориентирани на продажба во ресторани и во кафеани. Големите преработувачи веќе чувствуваат одреден негативен одраз врз профитабилноста, бидејќи граѓаните се преориентираа кон купување поевтини производи и во поголеми формати, а тоа значи и помала профитабилност. Се појавуваат и првите знаци на нарушена ликвидност кај помалите малопродажни објекти и пекарници, а што секако верижно ќе предизвика реакција и кај преработувачите на млеко – вели Ѓорѓи Петрушев, претседател на Здружението на земјоделство и прехранбена индустрија при Стопанската комора на Македонија.

Новите протоколи за работа на хотелите ја испратија во историјата шведската маса, а тоа автоматски влијае врз понудата на нивните кујни и набавки на храна.

– За оваа година останува да се работи со понуда од класичен континентален појадок, избор на главно јадење за ручек или вечера од неколку понуди на дневно мени, секако и ресторански услуги „а ла кард“ – вели Анета Бар, генерален директор на хотелот „Инекс Олгица“.

И домашните производители на пијалаци, се погодени од ограничувањата во време на корона-кризата. Дел од прехранбената индустрија со пиво и вино е исклучена и од можноста за плаќање со картичките за купување домашни производи. Таквата ситуација е поради фактот што државата не смее да стимулира промет со алкохол, кој е акцизна стока. Како и да е, домашните производители на безалкохолни и алкохолни пијалаци, страдаат и поради многубројните откажани манифестации, концерти и фестивали. Да не ги заборавиме и откажаните семејни прослави и свадбите. За некаков поголем промет во угостителството, надеж влеваат новите протоколи за сместување на повеќе гости на една маса.

Сепак, експертите се согласни дека поради специфичноста на производството и на дејноста, како и потребата од континуирано задоволување на основните потреби на луѓето со храна, не се очекува поголема криза во снабдувањето со основни прехранбени производи.